İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 59 Hüküm no: 11 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Selim Camii civarında oturan Mustafa Beşe b. Hasan’ın Mehmed adlı şahıstan alacaklı olduğu Mahmiye-i İstanbul’da Sultan Selim Hân Câmi‘-i şerîfi kurbünde sâkin işbu bâ‘isü’l-vesîka Mustafa Beşe b. Hasan meclis-i şer‘-i şerîf-i enverde Mehmed b. ( ) nâm kimesne mahzarında üzerine da‘vâ ve takrîr-i kelâm edip mezbûr Mehmed zimmetinde işbu yedimde olan deyn temessüğü nâtık olduğu üzere cihet-i karz-ı şer‘îden yüz on altı guruş hakkım olup meblağ-ı mezbûrdan bi’d-defe‘ât yetmiş guruşunu bana edâ ve teslîm, ben dahi ahz u kabz edip bâkī kırk altı guruşu edâdan imtinâ‘ eder, suâl olunup edâya tenbîh olunması matlûbumdur dedikde gıbbe’s-suâl mezbûr Mehmed cevâbında fi’l-hakīka müdde‘î-i mezbûra cihet-i mezkûreden kabzını i‘tirâf eylediğini yetmiş guruşdan mâ‘adâ kırk altı guruş deyni olduğunu ikrâr lâkin meblağ-ı mezbûrdan dahi dokuz yüz altmış para dahi edâ ve teslîm edip ancak yirmi iki guruş deynim kalmışdır deyicek, gıbbe’l-istintâk ve’l-inkâr mezbûr Mehmed’den ziyâdeyi def‘ine beyyine taleb olundukda isbât-ı beyyine için istimhâl etmeğin mehl-i şer‘î birle imhâl olundukdan sonra i‘tirâfı olan yirmi iki guruşu müdde‘î-i mezbûra edâ ve teslîm mezbûr Mehmed’e tenbîh olunup mâ-vaka‘a bi’t-taleb ketb olundu. Fi’t-tâsi‘ ve’l-ışrîn min-Zilka‘de li-sene tis‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed Çelebi b. ( ), Ali b. Bâli, Ebûbekir b. Hüseyin.