İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 59 Hüküm no: 12 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Hüseyin mahallesinden Receb b. Mehmed’in Hüseyin Beşe b. Osman’a olan borcunu taksitlendirmesi Dâru’l-hilâfeti’l-aliyyeti’l-Osmâniye Kostantıniyyetü’l-mahmiyye mahallâtından el-Hâc Hüseyin mahallesi sükkânından Receb b. Mehmed nâm kimesne meclis-i şer‘-i şerîf-i lâzımü’t-tevkīrde işbu sâhibü’l-vesîka Hüseyin Beşe b. Osman nâm kimesne mahzarında ikrâr ve takrîr-i kelâm edip mezbûr Hüseyin Beşe’ye cihet-i şer‘îden on yedi guruş ve bir sülüs guruş zimmetimde lâzımü’l-edâ ve vâcibü’l-kazâ deynim olup lâkin deyn-i merkūmu icâleten edâya iktidârım olmayıp te’cîl ve taksîte tâlib olduğumda mezbûr Hüseyin Beşe dahi her otuz bir gün tamâmında birer buçuk guruşu verip târih-i kitâbdan on bir ay tamâmına değin on altı buçuk guruşu ve bâkī yüz akçesini dahi on ikinci ay tamâmında kendüye edâ ve teslîm etmek üzere te’cîl ve taksît edip ben dahi meblağ-ı mukassat-ı mezkûru ber-vech-i muharrer edâya ta‘ahhüd ve iltizâm eyledim dedikde gıbbe’t-tasdîki’ş-şer‘î medyûn-ı mezkûrun zevce-i menkûhası işbu hâzıra bi’l-meclis Fâtıma bt. Abdullah nâm hatun meblağ-ı mukassat-ı mezbûra tarafından emr u kabûlü hâviye kefâlet-i sahîha-i şer‘iyye ile kefil oldum dedikde mâ-vaka‘a bi’t-taleb ketb olundu. Fi’l-aşer min-Zilhicce li-sene tis‘a ve tis‘în ve elf. Şuhûdü’l-hâl: Mustafa b. Şaban, İbrahim Çelebi b. Ahmed, Hasan b. Mehmed, Hasan b. Hüseyin.