İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 61 Hüküm no: 14 Orijinal metin no: [4a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu taifesinden el-Hac Sunullah b. Abdullah’ın tasarrufunda olan Rum Mehmed Paşa Vakfı’na ait evi ferağ ettiği el-Hac Ramazan, el-Hac Hasan ve el-Hac Mehmed adlı şahıslarla alacağı konusunda sulh olması Mahmiye-i İstanbul’da Çerağî mahallesinde sâkin Uncu tâifesinden el-Hâc Sun‘ullah b. Abdullah b. Abdurrahman tarafından husûs-ı âti’l-beyâna vekîl olup mahalle-i mezbûre sükkânından el-Hâc ( ) b. Mustafa ve Hüseyin b. Sun‘ullah şehâdetleri [ile] şer‘an vekâleti sâbite olan Hüseyin Efendi b. Mehmed meclis-i şerîf-i enverde ashâb-ı hâzihi’l-vesîka el-Hâc Ramazan b. Ali ve şerîkleri el-Hâc Hasan b. Osman ve el-Hâc Mehmed b. Osman nâm kimesneler muvâcehelerinde bi’l-vekâle takrîr-i kelâm ve ta‘bîr ani’l-merâm edip müvekkilim mezbûr el-Hâc Sun‘ullah bundan akdem Rum Mehmed Paşa Vakfı’ndan icâreteyn-i ma‘lûmeteyn ile taht-ı tasarrufunda olup mahmiye-i mezbûrede Küçükpazar’da Suterazisi kurbünde etrâf-ı erba‘ası ve mahzen ve muttasıl başka kapıda bir tahtânî oda ve bir fevkānî odayı müştemil iki kıt‘a menzilin nısfları mezbûrun olmağla bâ-izn-i mütevellî mezbûrûn el-Hâc Ramazan ve el-Hâc Hasan ve el-Hâc Mehmed altmış bin akçe mukābelesinde ferâğ ve tefvîz, onlar dahi tefevvüz ve kabûl eylediklerinden sonra bedel-i mezkûr zimmetlerinde bâkī kalmışdır deyü meblağ-ı mezbûru taleb ve da‘vâ eylediğinde onlar dahi meblağ-ı mezbûru taleb ve da‘vâ eylediğinde onlar dahi mezbûru tamâmen def‘ ve teslîmlerini iddi‘â ve bu vechile beynlerinde münâza‘ât-ı kesîre cereyân etmişdi. El-hâletü hâzihî beynlerine muslihûn tavassut edip da‘vâ-yı mezkûresinden mezbûr el-Hâc Sun‘ullah’ı otuz guruş üzerine sulh eylediklerinde ol dahi sulh-ı mezbûru kabûl ve bedel-i sulh olan meblağ-ı mezbûru yedlerinden alıp kabz edip menzil-i mezbûre ve bedeline [3b] ve sâir müte‘allika âmme-i da‘vâdan mezbûrûn el-Hâc Ramazan ve el-Hâc Hasan ve el-Hâc Mehmed’i ibrâ-i âmm-ı kātı‘ü’n-nizâ‘la ibrâ ve ıskāt eyledi, min ba‘d da‘vâ ve nizâ‘ı kalmadı dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. [Fî]-gurre-i Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: El-Hâc Ebûbekir b. Osman, el-Hâc Veli b. Musli, el-Hâc Ali b. Oruç, Mehmed Çelebi b. Mustafa, Osman Çelebi b. Mehmed, Osman Efendi.