İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 61 Hüküm no: 15 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Ali Ağa b. el-Hac Musli’nin Dergah-ı Âlî Yeniçerileri 58. Ağa Bölüğüne mahsus nükud vakfına olan borcuyla ilgili kardeşi Abdulbâki Çelebi’yi vekil tayin etmesi Mahmiye-i İstanbul’da Muhtesib İskender mahallesinde sâkin el-Hâc Ali Ağa b. el-Hâc Musli meclis-i şer‘de Dergâh-ı Âlî yeniçerilerinin elli sekizinci ağa bölüğüne mahsûs oda ahâlîsi mühimmâtı için mevkūf nukūda bi’l-fi‘il mütevellî olan işbu râfi‘ü’l-kitâb Ali Çelebi b. Rıdvan mahzarında ikrâr-ı tâm ve takrîr-i kelâm edip mezbûr Ali Çelebi yedinde olan mâl-ı vakf-ı mezbûrdan beş yüz esedî guruşu bana idâne ve teslîm ben dahi istidâne ve kabz etmekle zimmetimde vakf-ı mezbûr[a] beş yüz guruş deynim olmağla meblağ-ı mezbûr mukābelesinde yedimde mülküm olan mahalle-i mezbûrede vâki‘ bir tarafdan karındaşım Abdulbâki mülkü ve bir tarafdan Derviş Odabaşı menzili ve bir tarafdan odalar ve bir tarafdan tarîk-i âmla mahdûd büyût-ı adîdeyi müştemil menzilimi fâriğân ani’ş-şevâgil mütevellî-i mezbûra rehn vaz‘ ve teslîm ol dahi vech-i meşrûh üzere irtihân ve kabz u kabûl etdiğinden sonra meblağ-ı mezbûru târih-i kitâbdan yüz gün tamâmına değin edâ-yı deyn ve fesh-i akd ve fekk-i rehne ta‘ahhüd eyledim dedikde gıbbe’t-tasdîki’ş-şer‘î mezbûr el-Hâc Ali Ağa meclis-i şer‘de iâde-i kelâm edip lâkin müddet-i mukarrere tamâmında meblağ-ı mezbûr beş yüz guruşu mütevellî-i mezbûra edâ edemeyip zimmetimde kalırsa mahdûd-ı mezkûru semen-i misli ile âhara bey‘ ve kabz-ı semene ve semeninden vakf-ı mezbûra deynim olan meblağ-ı mezbûru mütevellî-i mezbûra edâya ve fazla kalır ise bana îsâle ve bunun mütevakkıf olduğu umûrun küllîsine tarafımdan karındaşım mezbûr Abdulbâki Çelebi’yi vekâlet-i devriye ile vekîl ve nâib-i menâb nasb u ta‘yîn eyledim, ol dahi vekâlet-i mezbûreyi kabûl ve hizmet-i lâzımesini edâya ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’l-ışrîn min-Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: İbrahim Çelebi b. Mehmed, el-Hâc Mustafa b. Hüseyin, Mehmed Beşe b. Hüseyin, Hüseyin Beşe b. İbrahim, Hasan b. Ahmed.