İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 63 Hüküm no: 17 Orijinal metin no: [4b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Mustafa b. Hüseyin’in kızı Fatma’nın kendisini oturdukları evde asması Mahmiye-i İstanbul’da Çakırağa mahallesinde vâki‘ Sinan Çavuş vakfı olan odaların birinde sâkin Berber Mustafa b. Hüseyin nâm kimesne meclis-i şer‘-i şerîfde takrîr-i kelâm ve ta‘bîr ani’l-merâm [edip] târih-i kitâb günü ba‘de’s-salâ sulbiye kızım Fâtıma nâm bikr-i bâliğa kendini sâkin olduğumuz menzilde asma çardakda bi-sun‘ihâ salb edip vefât etmekle savb-ı şer‘-i enverden üzerine varılıp keşf olunmak matlûbumdur deyü fermân-ı âlî ibrâz etmeğin imtisâlen savb-ı şer‘-i mutahhardan Hallâkîzâde Ahmed Efendi irsâl olunup ol dahi zeyl-i kitâbda muharrerü’l-esâmî ile zikr olunan odalara varıp fi’l-hakīka mezbûr Berber Mustafa’nın sâkin olduğu menzilde asma çardağı altında kızı mezbûre Fâtıma maslûbeten fevt olduğunu mezbûr Ahmed Efendi mahallinde ketb u tahrîr, ba‘dehû ma‘an ba‘s olunan Sarrâc el-Hâc İbrahim b. Receb ve muhzır Köse Mahmud b. Mehmed ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’t-taleb ketb olundu. Fi’l-yevmi’s-sâbi‘ ve’l-ışrîn min-Zilhicce li-sene tis‘a ve tis‘în ve elf. Şuhûdü’l-hâl: Eş-Şeyh Mehmed Efendibin Ahmed, Şaban Efendi b. Abdurrahman, es-Seyyid el-Hâc Ahmed b. es-Seyyid el-Hâc Mahmud, Mehmed Ağa b. Mehmed, Mehmed Çelebi b. Ali.