İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 63 Hüküm no: 18 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kebeciler Hanı’nda oturan Devecioğlu Manuk adlı Ermeninin vekil tayin ettiği Halil Ağa b. Abdullah’tan alacaklı olduğu iddiası Mahmiye-i İstanbul’da Kebeciler Hânı’nda sâkin Devecioğlu Manuk nâm Ermeni meclis-i şer‘-i şerîf-i enverde bâ‘is-i hâze’l-kitâb Halil Ağa b. Abdullah mahzarında üzerine da‘vâ ve takrîr-i kelâm edip bin doksan altı senesinde nişancı hâslarından vilâyet-i Anadolu’da Çorba kazâsında Yıldırım hâssını yüz altmış guruşa iltizâm ve yüz beş guruşunu mâlımdan ben ve elli beş guruşunu merkūm Halil Ağa’nın hizmetkârı İvaz’a edâ ve temessüğünü alıp anda tâlibe deruhde ve bedelini kabz ve mâlım mikdârını bana îsâl etmek üzere Halil Ağa’yı tevkîl ve temessüğü irsâl eylediğimde ol dahi kabûl ve hizmet-i mezbûreyi Hasan Ağa nâm kimesneye iltizâm ve temessüğü teslîm etmişdi. Bedel-i mezbûr makbûz ise anı, değil ise zabt temessüğünü taleb eylediğimde bana teslîmden imtinâ‘ eder, suâl olunup mûcebi icrâ olunmak matlûbumdur dedikde gıbbe’s-suâl mezbûr Halil Ağa cevâbında mezbûr Manuk hâss-ı mezkûru işbu hâzır bi’l-meclis Ali Bey için emriyle iltizâm ve bedeli olan yüz altmış guruşun elli beş guruşunu hizmetkârım mezbûr ve yüz guruşunu müdde‘î-i mezbûr edâ ve temessüğü olup hâss-ı mezkûr taraflarında zabt etdirdiklerinden sonra hizmetkârım mezbûrun medfû‘u olan elli beş guruşu onların tevkîl ve ihâlesiyle ben kabz edip hatta hâss-ı mezbûrun bedeli ber-vech-i meşrûh mezkûr Manuk’a deyni olduğunu nâtık merkūm Ali Bey’den temessük dahi olunmuşdur deyicek, gıbbe’l-istintâk mezbûr Manuk fi’l-hakīka hâss-ı mezkûru merkūm Ali Bey için emriyle deruhde ve ber-minvâl-i mübeyyen merkūm Ali Bey’den temessük aldığını mu‘terif ve merkūm Halil Ağa’nın kelimât-ı meşrûhasını tasdîk ve tahkīk etmeğin mûcebiyle merkūm Halil Ağa’nın zikr olunan hâslara müdâhalesi olmadığı lede’ş-şer‘i’l-enver zâhir ve mütehakkık olmağla mezbûr bî-vech mu‘âraza et[me]mek üzere işbu vesîka bi’t-taleb ketb olundu. Fî evâsıtı Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed Çelebi b. İdris, Ali b. Bâli, Mehmed b. Ahmed.