İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 64 Hüküm no: 19 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursa Yahşibey mahallesinden ölen Siyori v. Sofinoz’un varislerinin tereke anlaşmazlığı Mahrûse-i Bursa’da Yahşibey mahallesinde sâkin iken bundan akdem hâlik olan Siyori v. Sofinoz nâm zimmînin verâseti zevce-i metrûkesi Kavsen bt. Ayvat nâm nasrâniye ile li-ebeveyn kız karındaşı Kiryakine nâm nasrâniyeye munhasıra olduğu şer‘an mütehakkık oldukdan sonra hâlik-i mezbûrun kızı oğlu Preşkova nâm sagīrin babası ve velîsi ve hâlik-i mezbûrun mecmû‘ mâlının sülüsünü sagīr-i mezbûr için taleb ve da‘vâ ve ahz u kabza vasiyy-i muhtârı olduğu yedinde mazmûnu müsbet hüccet-i şer‘iyye ile sâbit olan bâ‘is-i hâze’s-sifr Kalberti nâm zimmî dîvân-ı kāimmakām-ı sadr-ı a‘zamîde ma‘kūd meclis-i şer‘-i şerîf-i âlîde hâlik-i mezbûrun muhallefâtına vâzı‘atü’l-yed olan mezkûre Kiryakine mahzarında bi’l-vesâye üzerine da‘vâ ve takrîr-i kelâm edip hâlik-i mezbûr Siyori bundan akdem hâl-i hayâtında ben hâlik olduğumda cemî‘ mâlımın sülüsü ifrâz olunup kızı oğlu merkūm Preşkova nâm zimmi-yi sagīre verile deyü vasiyyet ve tenfîzine beni vasiyy-i muhtâr nasb edip ben dahi ba‘de kabûli’l-vesâye musırran alâ vasiyyet hâlik olmağla vesâyet-i mahkiyyem hasebiyle hâlik-i mezbûrun ber-vech-i muharrer vasiyyetini yedimde olan işbu hüccet-i şer‘iyye nâtık olduğu üzere medîne-i Kite’de hilâfete müvellâ olup bu kaziyyenin istimâ‘ına memûr olan Mustafa Efendi huzûrunda mezbûretân Kavsen ve Kiryakine muvâcehesinde da‘vâ ve müdde‘âsını udûl-ı müslimînden olup mahrûse-i mezbûrede Câmi‘-i Kebîr mahallesinde sâkin Halil Çelebi b. Abdullah [5b] ve Sefer Bey b. Osman ile Mosi v. Kemel nâm Yahudi şehâdetleriyle isbât etdiğimde mevlânâ-yı müşârun-ileyh dahi hüccet-i mezkûrede isimleri mastûr olan cemm-i gafîrden sırran ve alenen ba‘de’t-ta‘dîl ve’t-tezkiye adâletleri zâhire olmağla şehâdetleri kabûl ve mûcebiyle hüküm ve yedime işbu hüccet-i şer‘iyyeyi verip mûcebince emr-i şehriyârî dahi vârid olmağla hâlik-i mezbûrun terekesinden merkūme Kavsen makbûzunun sülüsünü bana teslîm edip lâkin merkūme Kiryakine’den hâlik-i mezbûrun terekesinden makbûzunun sülüsünü taleb eylediğimde vermeden imtinâ‘ eder, suâl olunup sülüs-i mezkûrun yedimde olan hüccet-i şer‘iyye mûcebince mezbûre Kiryakine’den dahi alıverilmesi matlûbumdur dedikde gıbbe’s-suâl merkūme Kiryakine cevâbında fi’l-vâki‘ kaziyye bâlâda tafsîli murûr etdiği vech üzere olup mazmûn-ı hüccet-i mezkûreyi ikrâr lâkin mukaddemâ Bursa’da nâibü’ş-şer‘ huzûrunda murâfa‘a olduğumuzda şuhûd-ı mezbûrûn cerh olunmuşdu deyip sebeb-i cerhi kable’l-hüküm olduğunu beyân edemeyip yedinde olan beyyineleri dahi amele sâlih olmamağın mûcebiyle hâlik-i merkūmun muhallefâtından makbûzunun sülüsünü vasiyy-i mezbûra teslîme merkūme Kiryakine’ye tenbîh olunmağın mâ-vaka‘a bi’t-taleb ketb olundu. Fi’l-yevmi’s-sânî aşer min-Zilhicce li-sene tis‘a ve tis‘în ve elf. Şuhûdü’l-hâl: İbrahim Kethudâ b. ( ) Efendi, Mehmed Efendi b. Mehmed, el-Hâc Süleyman Çukadâr, Mehmed b. Mehmed.