İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 65 Hüküm no: 20 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac İbrahim Ağa b. Hamza’nın borçlarını ödemek üzere hizmetçisi Mehmed Çelebi b. Abdullah’a verdiği parasını ödeme yapılmadığından geri almak istemesi Mahmiye-i İstanbul’da Tavşantaşı mahallesinde sâkin işbu bâ‘isü’l-kitâb el-Hâc İbrahim Ağa b. Hamza meclis-i şer‘-i şerîf-i enverde mahmiye-i mezbûrede Havuzluhamam kurbünde sâkin Mehmed Çelebi b. Abdullah mahzarında üzerine da‘vâ ve takrîr-i kelâm edip sene-i sâbıka Şa‘bân’ında ben Mısır’a gider olduğumda mezbûr Mehmed Çelebi hizmetimde iken beynimizde ma‘lûm dâyinlerime deynim için ver deyü Üsküdar kurbünde Kavak nâm mahallede kendi çadırımda mezbûr Mehmed Çelebi’ye yirmi altı bin akçelik Mısrî paramı def‘ ve teslîm, ol dahi yedimden ahz u kabz etdikden sonra dâyinlerime vermeyip yedinde kalmağla hâlâ taleb ederim, suâl olunsun dedikde gıbbe’s-suâl mezbûr Mehmed Çelebi cevâbında husûs-ı mezbûru bi’l-külliye inkâr edicek, müdde‘î-i mezbûrdan sudûr-ı makāline mutâbık beyyine taleb olundukda mârru’z-zikr Tavşantaşı mahallesi sükkânından Osman Beşe b. Mehmed ve Mahmud Paşa mahallesinde sâkin Tahmisci el-Hâc Salih b. Mahmud nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ sene-i sâbıka Şa‘bân’ından müdde‘î-i merkūm İbrahim Ağa Mısır’a gider oldukda mezbûr Mehmed Çelebi hizmetinde iken beynimizde ma‘lûm deynlerime deynim için ver deyü merkūm el-Hâc İbrahim Ağa Üsküdar kurbünde Kavak nâm mahalde kendi çadırında işbu Mehmed Çelebi’ye yirmi [altı] bin akçelik Mısrî parasını bizim huzûrumuzda def‘ ve teslîm, mezbûr Mehmed Çelebi dahi yedinden ahz u kabz eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye etdiklerinde şâhidân-ı mezbûrân kıbel-i şerî‘at-ı garrâdan ta‘dîl ve tezkiye olunup her biri adl ve makbûlü’ş-şehâde oldukları cemm-i gafîr ihbârıyla şer‘an zâhir ve mütebeyyin oldukdan sonra şehâdetleri makbûle olmağın mûcebince ba‘de’l-hükmi’ş-şer‘î meblağ-ı mezbûr yirmi altı bin akçemi müdde‘î-i mezbûr el-Hâc İbrahim Ağa’ya edâ ve teslîme mezbûr Mehmed Çelebi’ye tenbîh olunup mâ-vaka‘a bi’t-taleb ketb [olundu]. Fi’l-yevmi’l-ışrîn min-Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: Abdullah Ağa b. İbrahim, Mehmed Efendi el-müzekkî, el-Hâc Hamza Çavuş [b.] el-Hâc Süleyman, İbrahim Çelebi b. Ahmed.