İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 66 Hüküm no: 21 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eğinli Bayram Beşe b. Mehmed’in kölelikten azat ettiği Yusuf b. Abdullah’a Kömürcü Yusuf b. Abdullah’ın el koyamayacağı Açık kaşlı orta boylu Tûtiyyü’l-asl Yusuf b. Abdullah meclis-i şer‘-i şerîfde kendüye rık olmak üzere vâzı‘ü’l-yed olan Unkapanı kurbünde sâkin Kömürcü Yusuf b. Abdullah mahzarında üzerine takrîr-i da‘vâ edip ben Dergâh-ı Âlî yeniçerilerinin altıncı cemâ‘atine mahsûs oda yoldaşlarından olup bir buçuk sene mukaddem sefer-i hümâyûna gidip anda vefât eden Eğinli Bayram Beşe b. Mehmed b. Abdullah’ın abd-i memlûku olup hâl-i hayâtında sefere gider oldukda beni mâlından tahrîr ve i‘tâk edip ben sâir ahrâr-ı asliyyîn gibi hür olmuş iken merkūm Yusuf bana rık olmak üzere vaz‘-ı yed eder, suâl olunup sebîlim tahliye ve kasr-ı yedine tenbîh olunması matlûbumdur dedikde gıbbe’s-suâl mezbûr Yusuf cevâbında mevsûf-ı mezbûru müteveffâ-yı mezbûrun evlâd-ı sıgārı Ömer ve Emine’nin vasiyy-i şer‘îleri işbu Mehmed b. İsmail’den otuz beş guruşa iştirâ ve temellük ve abd-i memlûkum olmağla vaz‘-ı yed ederim deyü ıtkını inkâr edicek, müdde‘î-i mezbûrdan müdde‘âsına beyyine taleb olundukda yine oda-i mezkûre cemâ‘atinden olan udûl-ı müslimînden Hasan Çelebi b. Şaban ve Receb Beşe b. Abdullah ve Mahmud Odabaşı b. Bayram ve Ahmed Beşe b. Mehmed nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ oda-i mezkûre yoldaşlarından olup sefer-i mezkûrda fevt olan Eğinli Bayram Beşe b. Mehmed b. Abdullah hayâtında sefere gider oldukda abd-i memlûku işbu mezbûr Yusuf’u bizim huzûrumuzda mâlından tahrîr ve i‘tâk eylemişdir, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle mezbûrun ıtkına ba‘de’l-hükm mâ-vaka‘a bi’t-taleb ketb olundu. Fî evâsıtı Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: Mustafa Çelebi b. Ahmed, İbrahim Çelebi [bin] Ahmed, Ali [b.] Bâli, Ebûbekir b. Hüseyin.