İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 67 Hüküm no: 22 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hatun bt. İbrahim’in kendisini boşayan el-Hac Mehmed b. Abdullah’dan mehir ve nafaka alması Mahmiye-i İstanbul’da Debbâğzâde mahallesinde sâkine a‘mâ Saliha Hatun bt. İbrahim tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Mollâ Yusuf b. Ahmed ve Halîfe b. Süleyman şehâdetleriyle şer‘an sâbit olan li-ebeveyn karındaşı Ali Çelebi meclis-i şer‘-i şerîf-i enverde zevc-i mutallıkı işbu râfi‘ü’l-kitâb el-Hâc Mehmed b. Abdullah mahzarında bi’l-vekâle ikrâr ve takrîr-i kelâm edip mezbûr el-Hâc Mehmed hemşîrem ve müvekkilem mezbûre Saliha’nın zevci olup târih-i kitâb günü bâyinen tatlîk etmekle zimmetinde mütekarrir ve ma‘kūdün-aleyh olan üç bin akçe mehr-i müeccelini ve nafaka-i iddet ve me’ûnet-i süknâsı mukābelesinde bi’t-terâzî ta‘yîn olunan altı yüz akçe ki cem‘an üç bin altı yüz akçemi bana def‘ ve teslîm ben dahi vekâletim hasebiyle yedinden tamâmen ahz u kabz etdiğimden sonra hukuk-ı zevciyyete müte‘allika âmme-i da‘vâdan her biri âharın zimmetini ibrâ-yı âmm-ı kātı‘ü’n-nizâ‘la ibrâ ve ıskāt eyleyip birbirleriyle da‘vâ ve nizâ‘ları kalmamışdır dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’l-ışrîn min-Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: Abdurrahman Efendi b. Hanefi, Hasan Efendi b. Mehmed, Mustafa Halîfe [bin] Osman, Hüseyin Çelebi b. Ahmed.