İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 67 Hüküm no: 23 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Receb ile Mustafa Çelebi b. Ahmed’in boşanarak zimmetlerini ibra etmeleri Dâru’l-hilâfeti’l-aliyye Kostantıniyyetü’l-mahmiyye Cafer Ağa mahallesinde sâkin olup zâtı ma‘rifet-i şer‘iyye ile ârifân İbrahim b. Ahmed ve Mustafa b. Şaban ta‘rîfleriyle mu‘arrefe olan Âişe bt. Receb nâm hatun meclis-i şer‘-i şerîf-i âlîde zevc-i muhâli‘i bâ‘is-i hâze’l-kitâb Mustafa Çelebi b. Ahmed mahzarında ikrâr-ı tâm ve takrîr-i kelâm edip zevcim mezbûr Mustafa Çelebi zimmetinde mütekarrir ve ma‘kūdün-aleyh olan bin yüz akçe mehr-i müeccelim üzerlerine ve nafaka-i iddet-i ma‘lûmem ve me’ûnet-i süknâm dahi kendi üzerime olup ve cihet-i deyn-i şer‘înin merkūm Mustafa Çelebi zimmetinde hakkım olan yirmi beş bin guruş mehirden bedel-i hul‘ olmak üzere merkūm Mustafa Çelebi ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl etdikden sonra hukuk-ı zevciyyete müte‘allika cemî‘ da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledik dedikde gıbbe’t-tasdîki’l-vicâhi mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: İbrahim Çelebi b. Mehmed, Mustafa Çelebi [bin] Şaban, İbrahim Çelebi b. Şaban, el-Hâc Ali.