İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 68 Hüküm no: 24 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısırlı Yanaki v. Mihaliki’nin varisleri olan karısı Zafire bt. Anton ile mühtedi oğlu Mehmed’in, Dimitraki v. Palalo’nun varislerinden alacak iddiası Mahrûse-i Galata’da Sultan Bayezid mahallesinde sâkin iken bundan akdem hâlik olan Mısırlı Yanaki v. Mihaliki’nin hasren vârisleri olan zevcesi Zafire bt. Anton nâm nasrâniye ile helâkinden sonra şeref-i İslâm ile müşerref olan oğlu Mehmed nâm mühtedî Dîvân-ı Hümâyûn’da ma‘kūd meclis-i şer‘-i şerîf-i âlîde bundan akdem hâlik olan Dimitraki v. Palalo nâm zimmînin li-ebeveyn karındaşı ve hasren vârisi olmağla terekesine vâzı‘ü’l-yed olan bâ‘is-i hâze’s-sifr Yorgi nâm zimmî mahzarında her biri üzerine da‘vâ ve takrîr-i kelâm edip târih-i kitâbdan yirmi dört sene mukaddem mûrisim merkūm Yanaki hâlik-i mezbûr Dimitraki ile terzilik san‘atında şerîkler olmağla sene-i mezbûrede mâl-ı şirket-i mezbûreden mezbûr Dimitraki zimmetinde altı yüz guruş hakkı olup kable’l-ahz mûrisim hâlik olmağla ben diyâr-ı âharda iken vâlidem merkūm Zafire meblağ-ı mezbûru merkūm Dimitraki’den taleb eyledikde oğlun geldikde edâ ederim deyü hayâtında on bir sene mukaddem ikrâr dahi etdiğinden sonra kable’l-edâ hâlik olmağın hâlâ terekesine vâzı‘ü’l-yed olan merkūm Yorgi’den suâl olunup meblağ-ı mezbûrun alıverilmesi matlûbumdur dediklerinde gıbbe’s-suâl ve’l-inkâr müdde‘iyân-ı mezbûrândan sıdk-ı makāllerine beyyine taleb olundukda müdde‘âlarını isbât için getirdikleri beyyine şâhid-i zûr olduğu Dîvân-ı Hümâyûn’da zâhir olmağla cerh olunup şâhid-i âdilesi olmadığından mâ‘adâ yirmi dört sene murûr edip şâ’ibe-i şirret fehm olunmağla min ba‘d mezbûrân Mehmed ve Zafire ber-vech-i muharrer bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’l-hâmis min-Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: İbrahim Ağa Kethudâ-yı ( ) Efendi, el-Hâc Süleyman Çukadâr, Ahmed Ağa Hazînedâr, Mehmed Efendi b. Himmet.