İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 69 Hüküm no: 26 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdüllatif’in evini kocası Abdülhay Efendi b. eş-Şeyh Taceddin’e satması Mahmiye-i İstanbul’da Tuti Latif mahallesinde sükkânından Âişe bt. Abdüllatif tarafından husûs-ı âti’z-zikri ikrâra vekîl olduğu zât-ı mezbûreyi ma‘rifet-i şer‘iyye ile ârifân mahalle-i mezbûre ahâlîsinden el-Hâc Mehmed b. Receb ve İsmail Çelebi b. Hüseyin şehâdetleriyle şer‘an sâbit olan İmâm el-Hâc Yusuf Efendi b. Abdülmennan meclis-i şer‘-i şerîf-i enverde müvekkile-i mezbûrenin zevci râfi‘-ı hâze’l-kitâb umdetü’l-kuzât Abdülhay Efendi b. eş-Şeyh Taceddin mahzarında bi’l-vekâle ikrâr-ı tâm ve takrîr-i kelâm edip müvekkilem mezbûre Âişe Hatun akd-i âti’z-zikrin sudûruna değin silk-i mülkünde münselik olup mahalle-i mezbûrede vâki‘ bir tarafdan Kassâb Salih mülkü ve bir tarafdan benim mülküm ve bir tarafdan ba‘zen Hasan Ağa ve ba‘zen Topal Âişe menzili ve bir tarafdan tarîk-i hâs ile mahdûd iki bâb oda fevkānî ve tahtında ahır ve samanlık ve kenîf ve bi’r-i mâ ve zât-ı eşcâr-ı müsmire ve gayr-ı müsmireyi müştemil mülk menzilimi tarafeynden îcâb ve kabûlü hâvî bey‘-i bâtt-ı sahîh-i şer‘î ile zevci mezbûr Abdülhay Efendi’ye yedi yüz elli esedî guruşa bey‘ ve temlîk ve teslîm ol dahi iştirâ ve kabûl ve temellük ve tesellüm eyledikden sonra semeni olan meblağ-ı merkūm yedi yüz elli esedî guruş mütâlebesinden zevci mezbûr Abdülhay Efendi’nin zimmetini ibrâ-i âm ile ibrâ ve ıskāt eyledi, fîmâ-ba‘d menzil-i mahdûd-ı merkūm mezkûr Abdülhay Efendi’nin mülk-i müşterâsı olmuşdur ve keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: Ali Ağa b. Abdullah, Hammâmî el-Hâc Mustafa b. el-Hâc ( ), Keresteci el-Hâc İsmail, el-Hâc Mehmed tâbi‘-i Şeyh Davud.