İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 69 Hüküm no: 27 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa Vakfı mütevellisi Halil Ağa b. İsmail’in vakfın vefat eden Kemerli el-Hac Mehmed’deki alacağını tahsil etmek istemesi Merhûm Ahmed Ağa Vakfı’na bi’l-fi‘il mütevellî olan Halil Ağa b. İsmail nâm kimesne meclis-i şer‘-i şerîf-i enverde mahmiye-i İstanbul’da Çukur mahallesinde sâkin iken bundan akdem vefât eden Keresteci el-Hâc Hüseyin b. Süleyman b. Abdurrahman’ın evlâd-ı sıgārının vâlideleri ve tesviye-i umûrlarına kıbel-i şer‘den mansûbe vasiyyeleri olmağla tereke-i müteveffâ-yı mezbûra vâzı‘atü’l-yed olan Ümniye bt. Ali tarafından ve kezâlik müteveffâ-yı mezbûrun terekesine vâzı‘ü’l-yed olan sulbî kebîre kızı Hadice taraflarından husûs-ı âti’l-beyâna vekîl olduğu zâtlarını ma‘rifet-i şer‘iyye ile ârifân Hüseyin Ağa b. Osman ve Yahya b. Ömer nâm kimesneler şehâdetleriyle şer‘an sâbit olan işbu bâ‘is-i hâze’l-kitâb mefharü’l-a‘yân Halil Efendi b. Mehmed mahzarında bi’t-tevliyet üzerine da‘vâ ve takrîr-i kelâm edip işbu yedimde olan temessük nâtık olduğu üzere bin doksan dört senesi şehr-i Ramazân-ı şerîfinin on sekizinci günü mâl-ı vakf-ı mezbûrdan gāib ani’l-meclis Kemerli el-Hâc Mehmed nâm kimesneye bin yüz guruş idâne ve teslîm ol dahi istidâne ve kabz ve tesellüm edip meblağ-ı mezbûra müteveffâ-yı mezbûr hayâtında emr ve kabûlü hâviye kefâlet-i sahîha ile kefil olduğundan sonra kefâletine binâen meblağ-ı mezbûru kable’l-edâ mezbûr el-Hâc Hüseyin vefât etmekle hâlâ vekîl-i mezbûra suâl olunup müvekkilleri tereke-i müteveffâ-yı mezbûrdan meblağ-ı mezbûru edâ etmek üzere tenbîh olunmak matlûbumdur dedikde gıbbe’s-suâl vekîl-i mezbûr cevâbında kaziyye minvâl-i meşrûh üzere olduğu sâbit olup lâkin müteveffâ-yı mezbûr meblağ-ı mezbûra târih-i mezkûr gününden üç yüz altmış gün tamâmına değin muvakkaten kefil olup hayâtında müddet-i mezbûre murûr etmekle mezbûr el-Hâc Hüseyin’in meblağ-ı mezbûr mütâlebesinden zimmeti berî olduğundan sonra vefât etmişidi deyü def‘le mukābele edicek, isre’l-istintâk ve’l-inkâr vekîl-i mezbûrdan def‘-i mezkûrunu mübeyyin beyyine taleb olundukda udûl-ı müslimînden olup mahmiye-i mezbûrede el-Hâc Muhyiddin mahallesi sükkânından el-Hâc Osman b. Mehmed ve Çukur mahallesinde merkūm Yahya Çelebi b. Ömer nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr el-Hâc Hüseyin b. Süleyman b. Abdurrahman [7b] mezbûr el-Hâc Mehmed’in ber-vech-i muharrer taraf-ı vakf-ı mezbûra deyni olan meblağ-ı mezbûr bin yüz guruşa hayâtında bin doksan dört senesi şehr-i Ramazân-ı şerîfinin on sekizinci gününden üç yüz altmış gün tamâmına değin bizim huzûrumuzda muvakkat kefil olup hayâtında müddet-i merkūme münkaziye olmağla mebâliğ-i mezbûr mütâlebesinden zimmeti berî olduğu hâlde vefât eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle mütevellî-i mezbûr ber-vech-i muharrer bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâmin aşer min-Zilhicce li-sene tis‘a ve tis‘în ve elf. Şuhûdü’l-hâl: İbrahim Ağa Kethudâ-yı ( ) Efendi, el-Hâc Süleyman Çukadâr, Mehmed b. Himmet Efendi, Mustafa Çelebi Sermuhzırân, el-Hâc İbrahim.