İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 71 Hüküm no: 28 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Kara Yani v. Komo’nun çırağı Yorgi v. Dimo’ya kefil olması Mahmiye-i İstanbul’da Yemiş İskelesi kurbünde bakkal olan Kara Yani v. Komo nâm zimmî meclis-i şer‘-i şerîf-i enver ve mahfil-i dîn-i münîf-i ezherde takrîr-i kelâm ve ta‘bîr ani’l-merâm edip Düğmeci Anton nâm zimmî bazı eşyâsı zâyi‘ olmak üzere dört seneden beri şâkirdim olan işbu hâzır bi’l-meclis Yorgi v. Dimo ile murâfa‘a-i şer‘-i şerîf olundukda mezbûr Anton müdde‘âsını isbât edemeyip ve mezkûr Yorgi’nin keyfiyet-i hâli istikşâf ve kefili alınmak bâbında fermân-ı âlî sâdır olmağla savb-ı şer‘-i kadîmden mezbûrun keyfiyet-i hâli istihbâr olunmak matlûbumdur deyip mazmûn-ı münîfi min külli’l-vücûh takrîr-i meşrûhuna mutâbık fermân-ı âlî ibrâz etmeğin imtisâlen-leh cânib-i şer‘-i kavîmden es-Seyyid Abdülmuti’ Efendi irsâl olunup ol dahi mahalle-i mezbûra varıp etrâfında sâkin mezkûrun ahvâline ıttılâ‘-ı tâmmı olan bî-garaz kimesnelerden mezbûrun keyfiyet-i hâlini isti‘lâm etdikde mezbûr Yorgi’nin töhmet-i mezkûrdan berî, kendi hâlinde olup bir vechile ithâma bâ‘is ahvâli ma‘lûmları olmadığını cemm-i gafîr ve cem‘-i kesir haber vermeğin vâki‘-i hâli mezbûr es-Seyyid Abdülmuti Efendi mahallinde ketb u terkīm edip ba‘dehû cânib-i şer‘den irsâl olunan Mehmed b. Ahmed ile meclis-i şer‘a gelip alâ vukū‘ihî inhâ ve takrîr etdikden sonra mezbûrânı ber-mûceb-i fermân-ı âlî husûs-ı mezbûra mübâşir olan Asesbaşı Kadri Ağa talebiyle mezkûr Yorgi’nin nefsine ve hîn-i mütâlebede meclis-i şer‘a ihzârına kefil olmağın işbu vesîka bi’t-taleb ketb olundu. Fî evâsıtı Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: Mustafa Çelebi b. Ahmed, İbrahim Çelebi b. Ahmed, Mehmed Çelebi b. ( ).