İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 72 Hüküm no: 30 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime Hatun Nükud Vakfı mütevellisi Havva bt. Abdülkadir’in vakfın eski Manisa kadısı Ömer Efendi’deki alacağını tahsil etmesi Mahmiye-i İstanbul’da Koğacı Dede mahallesinde vâki‘ merhûme Rahime nâm sâhibetü’l-hayrın nukūd-ı mevkūfesinde bi’l-fi‘il mütevelliye olan Havvâ bt. Abdülkadir nâm hatun ba‘de’t-ta‘rîfi’l-mu‘ayyen meclis-i şer‘-i şerîf-i enverde sâbıkā Manisa kādısı olan a‘lemü ulemâi’l-izâm mefharü’l-fudalâi’l-fihâm bâ‘is-i hâze’l-kitâb Ömer Efendi hazretleri mahzarında bi’t-tevliye ikrâr-ı tâm ve takrîr-i kelâm edip müşârun-ileyh hazretlerinin zevci iken vefât eden kız karındaşım Sakine vefât etdiğinde bi’t-tevliye makbûzu olan üç yüz elli guruş asl-ı mâl-ı vakf-ı mezbûr mûmâ-ileyh Ömer Efendi yedinde kalmağla hâlâ müşârun-ileyh Ömer Efendi ile muhâsebesini görüp dersiyesi için ta‘yîn olunan vezâyif-i ma‘lûmeden ve taraf-ı vakfı ibrâ edip ve asl-ı mâl olan üç yüz elli guruşu bana teslîm ben dahi kabz ve tesellüm eyledim, mezbûr mâl-ı vakf-ı mezbûrdan ve ribhinden müşârun-ileyh Ömer Efendi yedinde ve zimmetinde bir akçe ve bir habbe bâkī kalmadı dedikde gıbbe’t-tasdîki’l-mukarrer mâ-vaka‘a bi’t-taleb ketb olundu. Fî gurreti Zilhicce li-sene tis‘a ve tis‘în ve elf. Şuhûdü’l-hâl: Mehmed Efendi b. ( ), Mehmed Efendi, Ahmed Efendi b. Mustafa, Mehmed Efendi b. Himmet, İbrahim Ağa Kethudâ-yı Mehmed Ağa b. Ahmed.