İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 75 Hüküm no: 37 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdurrahim’in kocası es-Seyyid Abdülhalil Çelebi b. es-Seyyid Bahaeddin’deki alacağının tahsilini istemesi Mahmiye-i İstanbul’da Altı Boğaça mahallesinde sâkine bâ‘isetü’l-vesîka Âişe bt. Abdurrahim nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde zevci es-Seyyid Abdülhalil Çelebi b. es-Seyyid Bahaeddin mahzarında üzerine da‘vâ ve takrîr-i kelâm edip zevcim mezbûr es-Seyyid Abdülhalil Çelebi zimmetinde işbu yedimde olan hüccet-i şer‘iyye nâtık olduğu üzere cihet-i karzdan iki yüz esedî guruş hakkım olup taleb eylediğimde bana edâdan imtinâ‘ eder, suâl olunup alıverilmesi matlûbumdur dedikde gıbbe’s-suâl mezbûr es-Seyyid Abdülhalil Çelebi cevâbında fi’l-hakīka ber-vech-i meşrûh zevcesi müdde‘iye-i mezbûre Âişe Hatun yedinde olan hüccet-i şer‘iyye nâtık olduğu üzere zimmetinde iki yüz esedî guruş lâzımü’l-edâ ve vâcibü’l-kazâ deyni olduğunu ikrâr u i‘tirâf etmeğin alâ mûceb-i i‘tirâfihi meblağ-ı mezbûr iki yüz guruşu müdde‘iye-i mezbûre Âişe Hâtûn’a edâ ve teslîme mezbûr es-Seyyid Abdülhalil Çelebi’ye tenbîh birle mâ-hüve’l-vâkı‘ bi’t-taleb ketb olundu. Fi’l-yevmi’l-ışrîn min-Zilhicce li-sene tis‘a ve tis‘în ve elf. Şuhûdü’l-hâl: Es-Seyyid Hasan Çelebi b. Mahmud, es-Seyyid Mehmed Çelebi b. Mustafa, es-Seyyid Mustafa Çelebi b. İbrahim.