İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 77 Hüküm no: 39 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi taifesinin, usule aykırı olarak ekmek yapıp-satan ve işlerine zarar veren çörekçi taifesine engel olunmasını istemesi Mahmiye-i İstanbul’da vâki‘ ekmekçi tâifesinden Yakob v. Sahak ve Serkiz v. Sava ve Elik v. Bagrem ve Marat v. Menik nâm zimmîler ve sâirleri meclis-i şer‘-i şerîf-i enverde çörekçi tâifesinden Süleyman b. Ali mahzarında her biri takrîr-i kelâm ve ta‘bîr ani’l-merâm edip çörekçi tâifesi kadîmden olagelene mugāyir kırk elli dirhem eksik somunlar işleyip köşe başlarında ve esvâkda halka bey‘ edip ve müzâyakada işlemeyip bize kesâd verip ve ancak ordu ve gayrıda çörekçi harcı verip bizim ile edâ etmeyip bize ve halka gadr etmeleriyle ahvâlimizi der-i devlete i‘lâm eylediğimizde mezbûrlar men‘ u def‘ olunmak bâbında yedimize buyuruldu-yı şerîf dahi ihsân olunmağla ba‘de’n-nazar mezbûrlar men‘ u def‘ olunmak matlûbumuzdur deyü mazmûnu takrîr-i meşrûhlarına muvâfık buyuruldu-yı şerîf dahi ibrâz etmeleriyle mûcebince min ba‘d çörekçi tâifesinin vech-i meşrûh üzere eksik somun işlemeyip ve esvâkda dahi bey‘ etmekle ekmekçi tâifesine kesâd ve halka dahi zarâr etmeden men‘ u def‘ olunmak üzere tenbîh olunmağın mâ-vaka‘a bi’t-taleb ketb olundu. Fî evâsıtı Zilhicce li-sene tis‘a ve tis‘în ve elf. Şuhûdü’l-hâl: Ahmed Ağa Kethudâ-yı Ekmekçiyân, el-Hâc İbrahim b. Mehmed, Derviş b. Gaffar ve gayruhüm.