İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 77 Hüküm no: 40 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Mehmed’in boşandığı kocası İvaz Ağa b. Abdullah’dan haklarını alması ve birbirlerinin zimmetlerini ibra etmeleri Mahmiye-i İstanbul’da Sultançeşmesi mahallesinde sâkine Rukiye bt. Mehmed nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde zevc-i muhâli‘i İvaz Ağa b. Abdullah mahzarında ikrâr ve takrîr-i kelâm edip mezbûr İvaz zimmetinde mütekarrir ve ma‘kūdün-aleyh on üç bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere mezbûr İvaz Ağa ile muhâla‘a-i sahîha-i şer‘iyye ile muhâla‘a edip mezbûr İvaz Ağa dahi minvâl-i muharrer hul‘-ı mezbûru kabûl eylediğinden sonra hukuk-ı zevciyyete müte‘allika da‘vâdan herbirimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’l-hâmis ve’l-ışrîn min-Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: Ahmed b. İbrahim el-mübâşir, İbrahim Çelebi b. Ahmed, Mustafa b. Süleyman, el-Hâc Sun‘ullah b. Ramazan, Ali Beşe b. Mehmed, Ahmed b. Abdurrahman.