İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 78 Hüküm no: 41 Orijinal metin no: [9b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Yusuf’un kendi ve kardeşi Hüseyin’e ait Ankara sancağı Yabanova kazası Osmansın köyündeki ev ve arazilerini Ali Bey b. İbrahim’e satması Mahmiye-i İstanbul’da Mollâ Kestel mahallesinde sâkin Mustafa Çelebi b. Yusuf meclis-i şer‘-i şerîf-i enverde işbu bâ‘isü’l-kitâb Ali Bey b. İbrahim mahzarında ikrâr u i‘tirâf edip babam Yusuf’un ile’l-vefât mülkü olup ba‘de vefâtihî benim ile karındaşım Hüseyin’e isâbet ve intikāl edip vilâyet-i Anadolu’da Ankara sancağında Yabanova kazâsına tâbi‘ Osmansın nâm karyede vâki‘ bize intihâbla tahdîd ve tavsîfden müstağnî hâne ve sâir mülk arâzimi karındaşım mezbûr Hüseyin ile bin doksan dört senesinde mezbûr Ali Bey’e elli guruşa bey‘ ve temlîk, ol dahi iştirâ ve kabûl ve temellük edip semen-i mezbûr elli guruşu mezkûr Ali Bey bize edâ ve teslîm, biz dahi kabz ve tesellüm ve onları mahallinde kabz ve tasarrufa mezbûru taslît edip tarafından ba‘de’l-kabz karındaşım mezkûr fevt olup verâseti bana munhasıra olmağla semen-i mezbûr elli guruşdan mezkûr Ali Bey’de bir akçe ve bir habbe hakkım kalmayıp arâzi-i mezbûr mezkûr Ali Bey’in ol târihden beri mülk ve hakkı ve benim kat‘â alâka ve medhalim yokdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Zilhicceti’ş-şerîfe. Şuhûdü’l-hâl: El-Hâc ( ) b. Mahmud, Abdurrahman b. Ahmed Bey, Kengerli Hasan.