İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 78 Hüküm no: 42 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi b. Mehmed’in mudarebe usulüyle ortağı Mustafa Reis b. Abdullah’dan alacaklı olduğu iddiasının asılsız olduğu Mahrûse-i Galata muzâfâtından kasaba-i Tophane’de Yazıcı mahallesinde sâkin Ahmed Çelebi b. Mehmed meclis-i şer‘-i şerîfde sefîne reislerinden işbu râfi‘ü’l-kitâb Mustafa Reis b. Abdullah mahzarında üzerine da‘vâ ve takrîr-i kelâm edip târih-i kitâbdan iki sene mukaddem merkūm Mustafa Reis bi-tarîki’l-mudârebe yüz elli beş guruş vaz‘ ve teslîm ol dahi ba‘de’l-ahz meblağ-ı mezbûr ile beynimizde ma‘lûm metâ‘ iştirâ ve sefînesine tahmîl ve kasaba-i Kili’ye varıp geldikde asl-ı mâl-ı mezbûrun elli beş guruşunu ve fâidesinden hâsıl olup benim hisseme isâbet eden yedi guruşu merkūmun yedinden ahz u kabz edip mâ‘adâsı olan yüz guruşu asl-ı mâlım dahi mezbûrdan taleb ve ba‘de’l-yevm meblağ-ı mezbûr ile metâ‘ iştirâ ve diyâr-ı âhara götürmeden mezbûru men‘ ve nehy etmişdim, hâlâ suâl olunup meblağ-ı mezbûrun alıverilmesi matlûbumdur dedikde gıbbe’s-suâl mezbûr Mustafa Reis cevâbında târih-i mezbûrede müdde‘î-i merkūmdan bi-tarîki’l-mudarebe yüz elli guruş ahz ve meblağ-ı mezbûr ile metâ‘ iştirâ ve sefîneye tahmîl ve kasaba-i Kili’ye varıp geldiğimde asl-ı mâl-ı mezbûrun elli beş guruşunu ve fâidesinden hâsıl olup mezbûrun hissesine isâbet eden yedi guruşu müdde‘î-i mezbûra teslîm ol dahi ahz u kabz edip mâ‘adâsı olan yüz guruşu benden taleb ve ba‘de’l-yevm meblağ-ı mezbûr ile metâ‘ iştirâ ve ber-vech-i muharrer diyâr-ı âhara götürmeden beni men‘ ve nehy eyledikden sonra bin doksan sekiz rûz-ı Kasım’ında tekrâr meblağ-ı mezbûr ile İzmir metâ‘ı iştirâ ve sefîne ile kasaba-i Kili’ye gönderip bey‘ etmeğe bana izin vermekle ben dahi mezbûrun iznine binâen meblağ-ı merkūm ile ma‘lûmü’l-mikdâr İzmir metâ‘ı iştirâ ve sefîneme tahmîl ve kasaba-i Gözleve’ye karîb deryâda fırtına haz etmekle ondan nâşî sefîne-i mezbûre gark ve eşyâ-i mezbûre kendi mâlımla ma‘an bilâ-nakd zâyi‘ ve telef olmuşdur deyicek, gıbbe’l-istintâk ve’l-inkâr mezkûr Mustafa Reis’den sıdk-ı makālini mübeyyin beyyine taleb olundukda udûl-ı müslimînden olup zikri murûr eden kasaba-i Tophane’de Cihangiri mahallesinde sâkin Mehmed Çelebi b. Hamza ve Halil b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr Ahmed Çelebi vech-i mütebeyyin üzere merkūm Mustafa Reis’e men‘ ve nefy eyledikden sonra bin doksan sekiz rûz-ı Kasım’ında tekrâr meblağ-ı merkūm ile İzmir metâ‘ı iştirâ ve sefînesine tahmîl ve kasaba-i Kili’ye götürüp bey‘ etmekle merkūm Mustafa Reis’e bizim huzûrumuzda izin verip ol dahi mezbûrun iznine binâen meblağ-ı merkūm ile ma‘lûmü’l-mikdâr İzmir metâ‘ı iştirâ ve sefînesine tahmîl ve kasaba-i mezbûra gitmişdi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın fi’l-hakīka sefîne-i mezbûreyi deryâda fırtına ahz etmekle ondan nâşî sefîne-i mezbûre gark ve eşyâ-i mezbûre bilâ-te‘ad zâyi‘ ve telef olup meblağ-ı mezbûrun redd ü zımândan üzerine nesne lâzım gelmediğine mezbûr Mustafa Reis’e bi’l-iltimâs yemîn teklîf olundukda ol dahi hasbe’s-suâl yemîn billâhi te‘âlâ etmeğin mûcebiyle bî-vech mu‘ârazadan men‘ olunup mâ-hüve’l-vâkı‘ bi’t-taleb ketb olundu. Fi’l-yevmi’l-ışrîn min-Zilhicce li-sene tis‘a ve tis‘în ve elf. Şuhûdü’l-hâl: el-Hâc Ebûbekir b. Hüseyin, Musa Beşe b. Mehmed, Ali Beşe b. Osman, Osman Beşe b. Ahmed, Mehmed Beşe b. Mehmed, İbrahim Çelebi b. Ahmed, Ebûbekir b. Hüseyin, Ali Bâli ve gayruhüm.