İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 80 Hüküm no: 44 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Raziye bt. Mehmed’in varislerinin haklarını alarak birbirlerinin zimmetlerini ibra etmeleri Mahmiye-i İstanbul’da Tercüman Yunus mahallesi sâkinelerinden iken bundan akdem fevt olan Raziye bt. Mehmed nâm hâtûnun verâseti zevc-i metrûkü Süleyman b. Abdullah nâm kimesne ile li-ebeveyn kız karındaşı Âişe nâm hâtûna munhasıra olduğu şer‘an zâhir ve mütekarrir oldukdan sonra mezbûre Âişe tarafından husûs-ı âti’z-zikre vekîl olduğu zât-ı mezbûreyi ma‘rifet-i şer‘iyye ile ârifân Mehmed Çelebi b. Mahmud ve Hüseyin Çelebi b. Abdüsselam şehâdetleriyle şer‘an sâbit olan diğer Süleyman b. Abdullah meclis-i şer‘-i şerîf-i enverde mütevaffât-ı mezbûrenin zevci merkūm Süleyman mahzarında bi’l-vekâle ikrâr-ı tâm ve takrîr-i kelâm edip müteveffât-ı mezbûre Raziye’nin zevci merkūm Süleyman zimmetinde mütekarrir ve ma‘kūdün-aleyh olan bin beş yüz akçe mehr-i müecceli ve sâir terekesini müvekkilem mezbûre ile merkūm Süleyman beynlerinde iktisâm ve her biri nısf hisse-i irsiyyesini ahz ve istîfâ edip mûrisleri müteveffât-ı mezbûrenin kalîl ve kesîr ve celîl ve hakīr terekesinden her biri kendine isâbet eden hisse-i şer‘iyyesine müte‘allika âmme-i da‘vâdan âharın zimmetini ibrâ-i âm ile ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’l-hâmis ve’l-ışrîn min-Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: Hüseyin Çelebi b. Abdulbâki, Ahmed Çelebi b. Mahmud, Hüseyin Çelebi b. Abdullah ve gayruhüm.