İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 81 Hüküm no: 45 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi b. Ali’nin terekesine el koyan annesi Havva bt. Ali’nin, diğer varis olan kızı Ayşe’ye mirasdaki hissesini vermesi Mahmiye-i İstanbul’da Tercüman Yunus mahallesinde sâkin iken bundan akdem vefât eden Mustafa Efendi b. Ali’nin verâseti vâlidesi Havvâ bt. Ali nâm hatun ile li-ebeveyn karındaşı Âişe nâm hâtûna munhasıra olduğu şer‘an zâhir ve mütebeyyin oldukdan sonra mezbûre Âişe Hatun ba‘de’t-ta‘rîfi’ş-şer‘î meclis-i şer‘-i şerîf-i enver ve mahfil-i dîn-i münîf-i ezherde müteveffâ-yı mezbûrun terekesine vâzı‘atü’l-yed olduğu mütehakkık olan mezbûre Havvâ Hatun mahzarında bi’t-tav‘i’s-sâf ikrâr ve takrîr-i kelâm edip vâlidem mezbûre Havvâ Hatun karındaşım mezbûrun terekesine vâzı‘atü’l-yed olmağla bi-hasebi’l-irsi’ş-şer‘î tereke-i müteveffâ-yı mezbûrdan olmak üzere benim hisse-i mu‘ayyeneme isâbet eden meblağdan bana mezbûre Havvâ Hatun beş yüz doksan guruşu def‘ ve teslîm ben dahi yedinden bi’l-kıyâme meblağ-ı mezbûr beş yüz doksan guruşu ahz u kabz eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’r-râbi‘ ve’l-ışrîn min-Zilhicce li-sene tis‘a ve tis‘în ve elf. Şuhûdü’l-hâl: Cin Mustafa Çelebi b. Ali, Hasan b. Hüseyin, Ali Efendi b. Şaban, Cafer b. Abdullah, Berber Hüseyin Çelebi b. Mehmed.