İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 81 Hüküm no: 46 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi taifesinden Secaven v. Arakil v. Markos’un Hamet v. Aleksan’a ortak oldukları bargirler ile aletlerdeki hissesini satması Ekmekçi tâifesinden olup mahmiye-i İstanbul’da Havuzlu Hamam kurbünde sâkin Secaven v. Arakil v. Markos nâm Ermeni meclis-i şer‘-i şerîf-i enverde işbu bâ‘isü’s-sifr şerîki Hamet v. Aleksan nâm zimmî muvâcehesinde ikrâr-ı tâm ve takrîr-i kelâm edip hâlâ kurb-ı mezbûrda mevcûd olan yirmi yedi re’s bârgir ve sâir beynimizde ma‘lûme tekne ve bakurân? ve âlât-ı lâzımenin sülüs-i şâyi‘i benim ve sülüsânı mezbûr Hamet’in olup beynimizde eslâsen müşterek mülkümüz olmağla târih-i kitâbdan yirmi gün mukaddem vekîlim işbu Mıgırdıç v. Haço’ya mârru’z-zikr yirmi yedi bârgirden ve sâir âlât-ı mezbûreden sülüs hissemi bi-cümleti’t-tevâbi‘ mezbûr Hamet’e beş yüz guruşa vekâleten bey‘ ve teslîm ol dahi iştirâ ve kabûl ve tesellüm edip lâkin semen-i mezbûr müşterî-i merkūmun zimmetinde kalmışdı, hâlâ semen-i merkūmun iki yüz elli guruş için dâyinim işbu el-Hâc Mustafa b. Mehmed’i ve bâkī iki yüz elli guruş için âhar dâyinim işbu Ömer Ağa b. İbrahim’i mezbûr Hamet üzerine cümlemiz bir mahalde iken havâle-i sahîha-i şer‘iyye ile havâle edip ve her biri dahi havâle-i mezbûreyi kabûl etmeleriyle semen-i merkūm beş yüz guruşdan merkūm Hamet zimmetinde bir akçe ve bir habbe hakkım bâkī kalmayıp ve ba‘de’l-yevm bârgirler ve âlât-ı mezkûrede bir vechile alâka ve medhalim kalmamışdır dedikde gıbbe’t-tesâdukı’l-vicâhî mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Zilka‘de li-sene tis‘a ve tis‘în ve elf. Şuhûdü’l-hâl: el-Hâc ali b. Abdi, el-Hâc Mustafa b. Hüseyin, İbrahim Çelebi b. Ahmed, Mehmed Çelebi b. Derviş.