İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 82 Hüküm no: 47 Orijinal metin no: [11a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe b. Mehmed’in varislerinin, kefalet sebebiyle murislerinin alacaklı olduğu Ali Beşe b. Mehmed ile sulh olmaları Mahmiye-i İstanbul’da Yenibahçe kurbünde Sinan Paşa mahallesi sükkânından iken bundan akdem vefât eden Mustafa Beşe b. Mehmed nâm kimesnenin verâseti zevce-i metrûkesi Gülbûn bt. Abdullah ve sulbî kebîr oğlu Mehmed ve kebîre kızı Emetullah ve sagīr oğlu Süleyman’a münhasıra olduğu şer‘an zâhir ve mütebeyyin oldukdan sonra mezbûre Gülbûn kendi tarafından asâleten ve merkūme Emetullah tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân Ahmed Efendi b. Mustafa el-Müezzin ve Çizmeci Ahmed Çelebi nâm kimesneler şehâdetleriyle sâbit olmağla vekâleten ve sagīr-i mezbûr Süleyman’ın kıbel-i şer‘den mansûbe vasîsi olmağla vesâyeten ve mezbûr Mehmed dahi asâleten meclis-i şer‘-i şerîf-i enverde Ali Beşe b. Mehmed nâm kimesne mahzarında her biri asâleten ve vekâleten ve vesâyeten ikrâr ve takrîr-i kelâm edip mezbûr Ali Beşe’nin Dergâh-ı Âlî -dâme merci‘an li’l-e‘âlî- yeniçerilerinin elli üçüncü bölüğü ahâlîsinin üzerlerine mevkūf nukūddan istidâne ve kabz eylediği yüz otuz guruşa deynine mûrisimiz müteveffâ-yı mezbûr hayâtında tarafeynden emr ve kabûlü hâviye kefâlet-i sahîha-i şer‘iyye ile kefil olup bi-hükmi’l-kefâle meblağ-ı mezbûru bi’t-tamâm edâ ve teslîm eyledikden sonra meblağ-ı mezbûru kable’l-istîfâ mûrisimiz müteveffâ-yı mezbûr fevt ve meblağ-ı mezbûr irsen bize [10b] intikāl etmekle biz dahi mezbûr Ali Beşe’den meblağ-ı mezbûru taleb ve da‘vâ eylediğimizde ol dahi husûs-ı mezbûru bi’l-külliye inkâr edip ve biz dahi müdde‘âmızı isbât edemeyip ol vechile beynimizde nizâ‘-ı küllî vukū‘undan sonra beynimize muslihûn tavassut edip sulh-ı mezbûr sagīr-i merkūm hakkında evlâ ve enfa‘ olmağla hâlâ asâleten ve vekâleten ve vesâyeten altmış beş guruş üzerine akd-i musâlaha olundukda bizler dahi ber-vech-i muharrer sulh-ı mezbûru kabûl ve bedel-i sulh olan meblağ-ı mezbûru merkūm Ali Beşe yedinden bi’t-tamâm ve’l-kemâl ahz u kabz, husûs-ı mezbûre ve beynimizde ma‘lûme bir re’s su sığırı ve bir re’s karasığır öküzlerine müte‘allika cemî‘ da‘avât ve muhâsemât ve eymândan mezbûr Ali Beşe’nin zimmetini ibrâ-i âmm-ı râfi‘ü’l-hısâm ile ibrâ ve ıskāt eyledik dediklerinde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’l-hâmis ve’l-ışrîn min-Zilhicceti’ş-şerîfe. Şuhûdü’l-hâl: Ali Beşe b. Mustafa, Ahmed Efendi b. ( ), Çizmeci Ahmed Çelebi.