İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 83 Hüküm no: 48 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah bt. Seyfullah’ın Saliha bt. Abdullah’daki alacağından kalan bakiyenin tahsilini istemesi Mahmiye-i İstanbul’da Hasan Paşa kurbünde sâkine Emetullah bt. Seyfullah nâm hatun meclis-i şer‘-i şerîf-i enverde Saliha bt. Abdullah nâm hatun mazharında üzerine da‘vâ ve takrîr-i kelâm edip mezbûre Saliha’nın işbu yedime verdiği temessüğü nâtık olduğu üzere mezbûrenin zimmetinde elli yedi buçuk guruş hakkım olup meblağ-ı mezbûrun bundan akdem yirmi altı guruşunu yedinden ahz ve istîfâ edip otuz bir buçuk guruş hakkım zimmetinde kalmağla mezbûreye suâl olunup meblağ-ı bâkī-i mezbûru hakkını bana edâ ve teslîme tenbîh matlûbumdur dedikde gıbbe’s-suâl mezbûre Saliha Hatun cevâbında fi’l-hakīka müdde‘iye-i mezbûreye ber-vech-i muharrer otuz bir buçuk guruş zimmetinde lâzımü’l-edâ ve vâcibü’l-kazâ deyni olduğunu ikrâr ve i‘tirâf etmeğin alâ-mûcebi i‘tirâfihâ meblağ-ı mezbûr otuz bir buçuk guruş hakkını müdde‘iye-i mezbûreye edâ ve teslîme mezbûre Saliha Hâtûn’a tenbîh birle mâ-hüve’l-vâkı‘ bi’t-taleb ketb olundu. Fi’l-yevmi’l-hâmis ve’l-ışrîn min-Zilhicce li-sene tis‘a ve tis‘în ve elf. Şuhûdü’l-hâl: Ahmed Çelebi b. Süleyman, el-Hâc Süleyman Beşe b. İbrahim, İsmail b. Mustafa, İbrahim Çelebi b. Ahmed.