İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 83 Hüküm no: 49 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kandiye kadısı iken vefat eden Şamî Salih Efendi b. Ömer b. Hızır’ın terekesinden alacaklısı Salih Efendi’ye hakkının verilmesi Mahmiye-i İstanbul’da Tevkī‘i Cafer Çelebi mahallesi sükkânından olup cezîre-i Girid’de Kandiye kādısı iken bundan akdem fevt olan Şamî Salih Efendi b. Ömer b. Hızır’ın verâseti zevce-i menkûhası Ümmühânî bt. Abdurrahman b. Abdullah ile kebîr oğulları Sadık Mehmed Efendi ve Emin Mehmed Efendi’ye ve kebîre kızları Âişe ve Fâtıma’ya munhasıra olduğu şer‘an zâhir ve müte‘ayyin oldukdan sonra mezbûre Ümmühânî’nin tarafından vekîl olup zât-ı mezbûreyi ma‘rifet-i şer‘iyye ile ârifân olan Ahmed Efendi b. Hasan ve Cafer b. Mustafa şehâdetleriyle şer‘an vekâleti sâbite olan el-Hâc Osman Ağa b. Halil meclis-i şer‘-i şerîfde mezbûr Sadık Mehmed Efendi mahzarında üzerine da‘vâ ve takrîr-i kelâm edip mezbûre Ümmühânî Hâtûn’un li-ebeveyn karındaşı Mustafa Efendi b. Abdurrahman b. Abdullah merkūm Salih Efendi’ye iki sene mukaddem hâl-i hayâtında yedi yüz kırk altı esedî guruş ikrâz ve teslîm ol dahi iktirâz ve kabz edip ve ba‘dehû meblağ-ı mezbûrdan iki yüz kırk altı esedî guruşu merkūm Mustafa Efendi’ye edâ ve teslîm edip mâ‘adâ beş yüz guruşu kable’l-ahz merkūm Mustafa Efendi fevt olup verâseti li-ebeveyn kız karındaşı mezbûre Ümmühânî’ye isâbet ve intikāl eyledikden sonra mezbûr Salih Efendi dahi düyûnu terekesinden ezyed olduğu hâlde fevt olmağın suâl olunup tereke-i vâfiyesinden hissesine isâbet eden alıverilmek matlûbumdur dedikde gıbbe’s-suâl mezbûr Sadık Mehmed Efendi deyn-i mezbûru inkâr edicek, vekîl-i mezbûrdan müdde‘âsına beyyine taleb olundukda udûl-ı müslimînden olup Tophane’de Ebulfazl mahallesi imâmı Ahmed Efendi b. Hüseyin ve Cafer Çelebi [b.] Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müvekkile-i mezbûrenin li-ebeveyn karındaşı olup ba‘de vefâtihî verâseti irsen mezbûreye munhasır olan merkūm Mustafa Efendi b. Abdurrahman b. Abdullah târih-i mezkûrda hâl-i hayâtında bizim huzûrumuzda merkūm Şamî Salih Efendi b. Ömer b. Hızır’a yedi yüz kırk altı esedî ikrâz ve teslîm ol dahi iktirâz ve kabz etmişdi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle oldukdan sonra tahakkuk-ı özr-i şer‘î ile mezbûreyi mahallinde tahlîf için cânib-i şer‘den irsâl olunan Mehmed Efendi b. Mustafa mezbûrenin mahalle-i mezbûrede menziline varıp zeyl-i vesîkada muharrerü’l-esâmî müslimîn huzûrunda akd-i meclis-i şer‘-i şerîf etdikden sonra ba‘de’t-teşrîfi’ş-şer‘iyyi’l-mu‘teber meblağ-ı mezbûrdan kabzını mu‘terif olduğu iki yüz kırk altı guruşdan mâ‘adâ beş yüz guruşu müteveffâ-yı mezbûrdan merkūm Mustafa Efendi’nin ahz u kabz veyâ hibe veyâ âhara havâle eylediği ma‘lûmu olmayıp ve kendi dahi küllen ve ba‘zan ahz u kabz ve istîfâ ve hibe ve havâle etmeyip ve’l-hâsıl vücûh-ı şer‘îden bir vechile mezbûr Salih Efendi’nin zimmeti berî olmadığına mezbûreye yemîn teklîf etdikde ol dahi hasbe’s-suâl yemîn billâhi te‘âlâ etdiğini mezbûr Mehmed Efendi mahallinde ketb u tahrîr edip ba‘dehû cânib-i şer‘den ma‘an irsâl olunan el-Hâc Ömer b. Abdullah ve Mehmed b. Abdullah ile meclis-i şer‘a gelip alâ vukū‘ihî inhâ ve takrîr eylemeğin mûcebiyle ba‘de’l-hükm mâ-vaka‘a bi’t-taleb ketb olundu. Fî evâhiri Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: Mustafa Çelebi b. Ahmed, İbrahim Çelebi b. Ahmed, Ali Bâli, Mehmed b. Ali.