İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 85 Hüküm no: 51 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabık Haleb kadısı Abdullah Efendi’nin Abaza Mehmed Ağa b. Abdullah’daki alacağının ödenmesi Sâbıkā Halebü’ş-şihâb[şehbâ] kādısı olan a‘lemü’l-ulemâi’l-ızâm efdalü’l-fudalâi’l-fihâm Abdullah Efendi taraflarından husûs-ı âti’l-beyâna vekîl olup nehc-i şer‘î üzere vekâleti sâbit olan Mehmed Efendi b. Abdülferid meclis-i şer‘-i şerîf-i enverde Abaza Mehmed Ağa b. Abdullah mahzarında bi’l-vekâle da‘vâ ve takrîr-i kelâm edip sâbıkā Halebü’ş-şihâb[şehbâ] vâlîsi olup bundan akdem fevt olan Ebûbekir Paşa b. ( ) nâm müteveffânın Manyas Ovası nâm mevzi‘de vâki‘ tahdîd ve tavsîfden müstağnî ma‘lûmü’l-hudûd çiftlik ta‘bîr olunur mülk menzilini bundan akdem veresesi Ali Ağa nâm kimesneye iki bin esedî guruşa bey‘ ve teslîm ol dahi ba‘de’l-iştirâ müvekkil-i mûmâ-ileyh Abdullah Efendi’ye iki bin guruşa bey‘ ve teslîm onlar dahi iştirâ ve tesellüm ve semen-i mezbûru Ali Ağa’ya teslîm edip lâkin verese-i merkūmûnun vekîlleri olan çiftlik-i mezbûrun mukaddem târihde âhara bey‘ ve teslîm etmekle merkūm Ali Ağa’nın şirâsı müvekkil-i mûmâ-ileyhe bey‘ câiz olmamağla istirdâd-ı semen lâzım gelmeğin bundan akdem merkūm Ali Ağa müvekkil-i mûmâ-ileyhe medfû‘u olan iki bin guruş için merkūm Mehmed Ağa üzerine havâle-i sahîha ile havâle edip ol dahi havâle-i mezbûreyi kabûl etmekle meblağ-ı mezbûr iki bin guruşu bi-hükmi’l-havâle mûmâ-ileyh Abdullah Efendi’ye zimmetinde vâcibü’l-edâ deyni oldukdan sonra meblağ-ı mezbûrun beş yüz guruşu mûmâ-ileyhe edâ ve teslîm edip bâkī bin beş yüz guruşu alıverilmek bi’l-vekâle matlûbumdur dedikde gıbbe’s-suâl mezbûr Mehmed Ağa cevâbında kaziyye vech-i meşrûh üzere olup meblağ-ı bâkī-i mezbûr bin beş yüz guruş min ciheti’l-havâle müvekkil-i mûmâ-ileyh Abdullah Efendi hazretlerine vâcibü’l-edâ ve lâzımü’l-kazâ zimmetimde deynimdir deyü tav‘an ikrâr ve i‘tirâf etmeğin alâ mûceb-i i‘tirâfihî meblağ-ı bâkī-i mezbûr bin beş yüz guruşu edâ ve teslîme mezbûr Mehmed Ağa’ya tenbîh olunup mâ-hüve’l-vâkı‘ bi’t-taleb ketb olundu. Fi’l-yevmi’r-râbi‘ ve’l-ışrîn min-Zilka‘de li-sene tis‘a ve tis‘în ve elf. Şuhûdü’l-hâl: Fahru’l-müderrisîni’l-kirâm el-Hâc Receb Efendi b. İbrahim, Hüseyin b. İbrahim, Ahmed Efendni b. Mehmed, Ahmed Çelebi b. ( ), el-Hâc Yusuf b. ( ), el-Hâc Şaban.