İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 86 Hüküm no: 52 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiryako v. Yani tarafından köle diye el konulan Kalmon adlı Nasrani’nin hür asıllı olduğunu ispatlaması İşbu uzun boylu, açık kaşlı, sarı elâ gözlü Kalmon nâm Nasrânî meclis-i şer‘-i şerîf-i enverde kendüye rık olunmak üzere vâzı‘u’l-yed olan Kiryako v. Yani nâm zimmî mahzarında üzerine da‘vâ ve takrîr-i kelâm edip ben Boğdan diyârında Yaş’dan bir konak ötede Orhi kasabasında sâkin Belek re‘âyâdan hürrü’l-asl olan Vasil nâm zimmînin firâşından hâsıl ve zevce Marya nâm nasrâniyeden mütevellid hürrü’l-asl iken merkūm Kiryako bana rık olmak zu‘muyla bi-gayrı hakkın vaz‘-ı yed eder, suâl olunup üzerimden yed-i mubtılasının kasr ve izâlesine tenbîh ve sebîlim tahliye olunmak matlûbumdur dedikde gıbbe’s-suâl merkūm Kiryako cevâbında müdde‘î-i mezbûru üç sene mukaddem Rusiyyü’l-asl olmak üzere bir kimesneden semen-i ma‘lûma iştirâ etmişdim, ber-vech-i muharrer hürrü’l-asl olduğu ma‘lûmum değildir deyicek, müdde‘î-i mezbûrdan müdde‘âsını mübeyyin beyyine taleb olundukda udûl-ı müslimînden olup Eğrikapı dâhilinde sâkin Baki Bey etbâ‘ından Abdullah b. Stefan nâm mühtedî ile Nikola v. Preşko nâm Nasrânî ve Kostendi v. Yonaşko nâm zimmî li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka işbu müdde‘î-i mezbûr Kalmon zikr olunan Orhi kasabasında sâkin hürrü’l-asl olan merkūm Vasil’in firâşından hâsıl ve zevcesi hürretü’l-asl olan Marya’dan mütevellid hürrü’l-asldır, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fî evâhiri Zilhicce li-sene tis‘a ve tis‘în ve elf. Şuhûdü’l-hâl: İbrahim Ağa kethudâsı efendi, el-Hâc Süleyman Çukadâr, Mehmed Efendi b. Ahmed, Mustafa Çelebi muhzırân, Ahmed Ağa Hazînedâr.