İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 87 Hüküm no: 53 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koyun Emini Ahmed Ağa Vakfı tevliyetinin vakfiye şartı olarak tüm çocuklarına ait olduğu Ashâb-ı hayrâtdan merhûm Koyun Emîni Ahmed Ağa nâm sâhibü’l-hayrın evlâdından Havvâ nâm hâtûnun zevci ve tarafından vekîl-i müsecceli Mehmed Ağa b. Hüseyin ve Hanife Hâtûn’un vekîl-i şer‘îsi zevci Mehmed Çelebi b. Ömer Ağa meclis-i şer‘-i şerîf-i enverde yine vâkıf-ı mezbûrun oğlu Mehmed mahzarında takrîr-i kelâm edip vâkıf-ı mezbûr işbu vakfiye-i ma‘mûlün-bihâ ve ma‘mûlün-aleyhâsını nâtık olduğu üzere vakfının tevliyetini evlâdına ve evlâd-ı evlâdına ve evlâd-ı evlâdına şart ve ta‘yîn ve merkūmât Havvâ ve Hanife ve mezbûretânın hemşîresi Âişe ve mezbûr Mehmed Ağa vâkıf-ı mezbûrun sulbî evlâdı ve derece-i vâhidede olmağın tevliyet-i mezkûre iştirâk-ı seviy üzere hakk-ı meşrûtaları iken Mehmed Ağa tevliyet-i mezkûreyi müstakil zabt edip müvekkiletân-ı mezbûretânı müdâhaleden men‘ eder, suâl olunup ber-mûceb-i vakfiye amel olunmak üzere tenbîh olunması matlûbumuzdur deyip mazmûnu min külli’l-vücûh takrîr-i meşrûhuna mutâbık bulunmağın gıbbe’s-suâl mezbûr Mehmed Ağa husûs-ı mezbûru bi’l-külliye mu‘terif olup ve vakfiye-i mezbûrede tevliyet-i mezbûre evlâda ve evlâd-ı evlâda ve evlâd-ı evlâda meşrût olduğu mastûr ve müserrah ve ber-mantûk-ı vakfiye tevliyet-i mezbûre cümlenin hakk-ı meşrûtu olduğu mütehakkık olmağın tevliyet-i mezkûreye ber-mûceb-i şart-ı vâkıf mutasarrıf olmak üzere işbu vesîka bi’t-taleb ketb olundu. Fî evâhiri Zilhicce li-sene tis‘a ve tis‘în ve elf. Şuhûdü’l-hâl: es-Seyyid İbrahim Çelebi b. Mehmed, Hacı Mustafa b. Mehmed, İbrahim Çelebi b. Ahmed ve gayruhüm.