İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 88 Hüküm no: 55 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdullah’ın mehir ve nafakasını alarak Ahmed Beşe b. İsmail’den boşanması Mahmiye-i İstanbul’da Debbağzâde mahallesi sâkinelerinden olup zâtı ma‘rifet-i şer‘iyye ile ârifân Mustafa Efendi b. Mehmed ve diğer Mustafa Halîfe b. Abdülferid nâm kimesneler ta‘rîfleriyle mu‘arrefe olan Hadice bt. Abdullah nâm hatun meclis-i şer‘-i şerîf-i enverde zevc-i dâhili bâ‘isü’l-kitâb Ahmed Beşe b. İsmail’in oğlu ve tarafından husûs-ı âti’l-beyâna vekîl olduğu mu‘arrifân-ı mezbûrân şehâdetleriyle şer‘an sâbit olan Mustafa Çelebi nâm kimesne mahzarında ikrâr ve takrîr-i kelâm edip zevcim mezbûr Ahmed Beşe zimmetinde mütekarrir ve ma‘kūdün-aleyh olan iki bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere müvekkil-i mezbûr Ahmed Beşe ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra hukuk-ı zevciyyete müte‘allika âmme-i da‘vâdan herbirimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik, mezbûrun firâşından hâsıl ve benden mütevellid sagīr oğlu İsmail’i bilâ-nafaka imsâke ta‘ahhüd eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sâmin ve’l-ışrîn min-Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: Mustafa Efendi b. Mehmed ve Mustafa Halîfe b. Abdülferid ve Mustafa Çelebi b. Şaban, Receb Çelebi b. Mehmed, Mustafa Çelebi b. ( ), el-Hâc Ali b. Abdullah.