İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 89 Hüküm no: 57 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayrat sahibi Koyun Emini Ahmed Ağa’nın çocukları Havva ve Hanife’nin, babalarına ait vakfın mütevellisi olan kardeşleri Mehmed’in muhasebesinin görülmesini istemeleri Mahmiye-i İstanbul’da vâki‘ ashâb-ı hayrâtdan merkūm Koyun Emîni Ahmed Ağa nâm sâhibü’l-hayrın evlâdından Havva nâm hâtûnun zevci ve vekîl-i şer‘î olan Mehmed Ağa b. el-Hâc Hüseyin ve Hanife nâm hâtûnun dahi zevci ve vekîl-i şer‘îsi Mehmed Çelebi b. Ömer Ağa meclis-i şer‘-i şerîfde vâkıf-ı mezbûrun oğlu Mehmed Ağa mahzarında üzerine da‘vâ ve takrîr-i kelâm edip mezbûr Mehmed Ağa tevliyet-i vakf-ı mezbûru bir mikdâr zamân müstakillen zabt etmişidi. Vâkıf-ı mezbûr tevliyetini evlâdına ve evlâd-ı evlâdına ve evlâd-ı evlâdına şart ve ta‘yîn eylediği vakfiye-i ma‘mûlün-bihâsında mastûr ve mukayyed ve mezbûretân merkūm Mehmed Ağa ile vâkıf-ı mezbûrun sulbî evlâdı olup tevliyet-i mezbûre cümlenin hakk-ı meşrûtası olmağla fîmâ-ba‘d iştirâk-ı seviy üzere zabt u tasarruf etmek üzere tenbîh olunup hüccet-i şer‘iyye verilmekle hâlâ mezbûr Mehmed Ağa’ya suâl olunup bi’t-tevliye asl-ı mâl olup makbûzu olan iki bin guruşun muhâsebesi görülmek matlûbumuzdur dediklerinde gıbbe’s-suâl mezbûr Mehmed Ağa cevâbında fi’l-hakīka bâlâda tafsîl olunan minvâl üzere iki bin guruşu bi’t-tevliye kabz ve meblağ-ı mezbûrun yedi yüz kırk iki guruşunu Âişe nâm hâtûna üç yüz on altı guruşunu Hadice Hâtûn’a ve yüz kırk beş guruşunu Dimitraki nâm zimmî ve yüz guruşunu Keresteci Yahudi’ye ve yüz guruşunu İbrahim Kethudâ ve elli guruşunu Âişe’ye ve yüz elli guruşunu kendi mesârifine sarf[la] istihlâk edip min ciheti’l-mecmû‘ bin yedi yüz guruşu zimem ve üç yüz guruşunun rehini olduğu lede’ş-şer‘i’l-enver zâhir ve mütekarrir olmağla zikr olunan meblağları cem‘ ve tahsîle ve bilâ-rehn ve lâ-kefîl idâne etmekle tahsîli mümkün olmayanı tazmîn etmek üzere merkūm Mehmed Ağa’ya tenbîh olunup mâ-hüve’l-vâkı‘ bi’t-taleb ketb olundu. Fî evâhiri Zilhicce li-sene tis‘a ve tis‘în ve elf. Şuhûdü’l-hâl: es-Seyyid İbrahim Çelebi b. Mehmed, Hacı Mustafa Çelebi b. Mehmed, Mustafa Çelebi b. Hüseyin, İvaz b. Abdullah ve diğer Siyavuş b. Abdullah.