İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 94 Hüküm no: 65 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Veli ile Mirza b. Yahya’nın boşanarak birbirlerinin zimmetlerini ibra etmeleri Mahmiye-i İstanbul’da Tahta Minare mahallesinde sâkine Emine bt. Veli nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde zevc-i dâhili işbu bâ‘isü’l-kitâb Mirza b. Yahya mahzarında ikrâr-ı tâm ve takrîr-i kelâm edip zevcim merkūm Mirza zimmetinde mütekarrir ve ma‘kūdün-aleyh olan dokuz yüz akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere merkūm Mirza ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl etdikden sonra hukuk-ı zevciyyete müte‘allika âmme-i da‘vâdan herbirimiz âharın zimmetini ibrâ-i âmla ibrâ ve ıskāt eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis mine’l-Muharremi’l-harâm li-sene mi’e ve elf. Şuhûdü’l-hâl: Hasan Halîfe b. Mehmed el-Müezzin, Hüseyin b. Ali, Ali b. Hüseyin, İbrahim Çelebi b. Ahmed ve gayruhüm.