İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 94 Hüküm no: 66 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merkez Efendi Zaviyesi şeyhi Seyyid Ahmed Efendi b. Seyyid Abdullah Efendi’ye akıl hastalığı sebebiyle Mehmed Efendi b. Ahmed’in vasi tayin edilmesi Dârü’l-hilâfeti’l-aliyye Kostantıniyyetü’l-mahmiye’de Merkez Efendi Zâviyesi şeyhi olan es-Seyyid Ahmed Efendi b. es-Seyyid Abdullah Efendi elân cünûn-ı mutbıka ile mecnûn olmağla vezâyifini cem‘ ve tahsîl ve nafaka ve kisve ve mühimmâtın görüp ve bi’l-cümle tesviye-i umûruna bir vasî nasb u ta‘yîn olunmak lâzım ve mühim ve işbu bâ‘isü’l-kitâb Şeyh Ebulvefa kurbünde Molla Güranî mahallesinde sâkin Mehmed Efendi b. Ahmed mütedeyyin ve perhizkâr olup vesâyet-i mezkûre uhdesinden gelmeğe kādir olduğunu udûl-ı sahîhatü’l-kelimâtdan es-Seyyid Ahmed Çelebi b. es-Seyyid Hasan ve el-Hâc Ali Dede b. Mehmed Efendi ve es-Seyyid Seyfullah Çelebi b. es-Seyyid Ahmed ve zeyl-i kitâbda mektûbü’l-esâmî müslimîn ihbâr etmeğin işbu kitâb-ı müşgîn-nikābı tevkī‘-i refî‘-i müstetâbıyla şeref-yâb olan hâkim-i ma‘delet-nisâb -tûbâ lehû ve hüsnü me’âb- hazretleri mezkûr Mehmed Efendi’yi mecnûn-ı mezkûra vasî nasb u ta‘yîn etdikde ol dahi kabûl ve hizmet-i lâzımesini kemâ yenbeğî edâya ta‘ahhüd etmeğin işbu vesîka bi’t-taleb ketb olundu. Fi’l-yevmi’s-sâbi‘ mine’l-Muharremi’l-haram li-sene mi’e ve elf. Şuhûdü’l-hâl: Umdetü’l-kâmilîn es-Seyyid Hüseyin Efendi b. eş-Şeyh Mehmed Efendi, es-Seyyid Mehmed Efendi b. es-Seyyid Hüseyin Efendi, Hasan Dede b. Ali, Mustafa Efendi b. Ali, Hasan Efendi b. Ali.