İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 95 Hüküm no: 67 Orijinal metin no: [15a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Kemal mahallesinden El-Hac Musli b. Ahmed’in varisleri arasındaki anlaşmazlık Sîmkeş tâifesinden olup mahmiye-i İstanbul’da Hacı Kemal mahallesinde sâkin iken bundan akdem vefât eden el-Hâc Musli b. Ahmed’in verâseti zevce-i metrûkesi Âişe bt. Abdullah ile kebîre kızları Fâtıma ve Hadice ve Âişe ve Meryem’e ve li-ebeveyn karındaşları el-Hâc Veli ve Hüseyin Çelebi’ye munhasıra olup ba‘dehû mezbûr Meryem dahi fevt olup verâseti li-üm kız karındaşları mezbûretân Fâtıma ve Hadice ve li-üm kız karındaşı mezbûre Âişe ve li-ebeveyn ammileri mezbûrân el-Hâc Veli ve Hüseyin Çelebi’ye munhasıra olduğu şer‘an zâhir ve müte‘ayyin oldukdan sonra mezbûrât Âişe ve Fâtıma ve Hadice ve diğer Âişe ve Meryem ba‘de’t-ta‘rîfi’ş-şer‘î meclis-i şer‘-i şerîf-i enverde işbu bâ‘isü’l-kitâb mezbûr el-Hâc Veli mahzarında üzerine da‘vâ ve takrîr-i kelâm edip mûrisimiz müteveffâ-yı mezbûrun veresesi tahrîr ve beyne’l-verese beynimizde taksîm ve herbirimiz hisse-i irsiyyemizi ahz u kabz etmişdik, lâkin mezbûr el-Hâc Veli müteveffâ-yı mezbûrun terekesinden hâric ez-defter on altı guruş ve bin yedi yüz akçe nakid ile on sekiz guruş kıymetli bir sîm halkasın kabz ve ketb ve ihfâ etmeğin hâlâ suâl olunup hissemizi teslîme tenbîh olunmak matlûbumuzdur dediklerinde gıbbe’s-suâl ve akībe’l-inkâr mezkûrâtdan müdde‘âlarına beyyine taleb olundukda ityân-ı beyyineden izhâr-ı acz ve istihlâf edicek, fi’l-hakīka tereke-i müteveffâ-yı mezbûrdan meblağayn-i mezbûreyn ile zikr olunan halkayı ahz ve ketm ve ihfâ etmeyip hisselerini redd ü teslîm lâzım gelmediğine mezbûr el-Hâc Veli’ye yemîn teklîf olundukda ol dahi hasbe’s-suâl half billâhi’l-aliyyi’l-a‘la etmeğin mûcebiyle mezbûrât bilâ-beyyine bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâmin mine’l-Muharremi’l-harâm li-sene mi’e ve elf. Şuhûdü’l-hâl: İbrahim Çelebi b. Ahmed, Ali b. Bâli, Ebûbekir b. Hüseyin, Mustafa Galatalı.