İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 95 Hüküm no: 68 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan taifesinin ehl-i hibreleri Mahmud’un vefatı üzerine yerine Mustafa Beşe b. Mehmed’i seçmesi Mahmiye-i İstanbul ve Üsküdar ve Galata ve Haslar kazâlarında vâki‘ bahçıvan tâifesinden Musa b. Hasan ve Ali b. Halil ve Mehmed b. Ahmed ve Halil Beşe b. İbrahim ve Ahmed b. Osman ve sâirleri meclis-i şer‘-i şerîf-i enverde işbu bâ‘isü’l-vesîka Mustafa Beşe b. Mehmed mahzarında her biri takrîr-i kelâm ve ta‘bîr ani’l-merâm edip tâife-i mezbûrenin ehl-i hibreleri olan Mahmud fevt olup beynimizde ehl-i hibre ol[ma]mağla umûrumuz muhtel ve mezbûr Mustafa Beşe bostâncılık umûruna vukūf-ı tâmmı olup her vechile hizmet-i mezkûre uhdesinden gelmeğe kādir olmağın mezbûru beynimizde ehl-i hibre ihtiyâr eyledik, huzûr-ı şer‘-i kavîmden dahi vesîka tahrîr olunması matlûbumuzdur dediklerinde mezkûr Mustafa Beşe dahi tâife-i mezkûreye ehl-i hibre ta‘yîn olundukda ba‘de’l-kabûl hizmet-i lâzımesin ta‘ahhüd etmeğin işbu vesîka bi’t-taleb ketb olundu. Fî evâhir-i şehri Ramazâni’l-mübârek li-sene tis‘a ve tis‘în ve elf. Şuhûdü’l-hâl: Mustafa Ağa Sermuhzırân, İbrahim Ağa kethudâ-yı ( ) efendi, Musa Efendi b. Hasan, Ali Çelebi b. Halil, Ahmed b. İbrahim, Hüseyin b. Abdullah.