İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 96 Hüküm no: 69 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çelebi b. Abdullah’ın Dergah-ı Âlî yeniçerilerinden Mehmed Beşe b. Musa’daki alacağının tahsilini istemesi Mahmiye-i İstanbul’da Altımermer kurbünde sâkin Süleyman Çelebi b. Abdullah meclis-i şer‘-i şerîf-i enverde Dergâh-ı âlî yeniçerilerinin yirminci sekbânlarına mahsûs oda yoldaşlarından Mehmed Beşe b. Musa mahzarında üzerine da‘vâ ve takrîr-i kelâm edip bundan akdem mezbûr Mehmed Beşe’ye beher mâh üç yüz on sekiz akçeye îcâr ve teslîm ol dahi ber-vech-i muharrer istîcâr ve kabûl eylediği mârru’z-zikr Altımermer sûkunda vâki‘ lede’l-ahâlî ma‘lûmü’l-hudûd bir bâb oda bardakçı? dükkânı ücretinden mezbûr Mehmed Beşe zimmetinde müctemi‘ iki bin iki yüz akçe hakkım olup taleb eylediğimde edâdan imtinâ‘ eder, suâl olunup meblağ-ı mezbûrun alıverilmesi matlûbumdur dedikde gıbbe’s-suâl mezbûr Mehmed cevâbında kaziyye minvâl-i muharrer üzere olup lâkin meblağ-ı mezkûr iki bin iki yüz akçeyi müdde‘î-i mezbûr Süleyman Çelebi’ye edâ ve teslîm edip meblağ-ı mezbûrdan benim zimmetim berî olmuşdur dedikde isre’l-istintâk ve’l-inkâr mezbûr Mehmed Beşe’den def‘-i meşrûhuna beyyine taleb olundukda isbât-ı beyyineden izhâr-ı acz ve istihlâf etmeğin müdde‘î-i mezbûre meblağ-ı mezbûr iki bin iki yüz akçeyi merkūm Mehmed Beşe’den ahz u kabz etmeyip ol vechile meblağ-ı mezbûrdan merkūm Mehmed Beşe’nin zimmeti berî olmadığına yemîn teklîf olundukda mezbûr Süleyman Çelebi dahi alâ vefki’l-mes’ûl yemîn billâhi’l-aliyyi’l-a‘lâ etmeğin meblağ-ı mezbûr iki bin iki yüz akçeyi müdde‘î-i mezbûr Süleyman Çelebi’ye edâ ve teslîm merkūm Mehmed Beşe’ye tenbîh olunup mâ-vaka‘a bi’t-taleb ketb olundu. Fi’l-yevmi’l-âşir min şehri Muharremi’l-harâm li-sene mi’e ve elf. Şuhûdü’l-hâl: Süleyman Beşe b. Mehmed, Mehmed b. Mustafa, Mustafa Çelebi b. Ahmed, İbrahim Çelebi b. Ahmed.