İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 96 Hüküm no: 70 Orijinal metin no: [15b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem bt. Abdullah’ın mehr ve nafakasını alarak Mehmed b. Hasan’dan boşanması Mahmiye-i İstanbul’da Odabaşı Çarşısı kurbünde sâkine olup zâtı ma‘rifet-i şer‘iyye ile ârifân Ebûbekir b. Hüseyin ve Ali b. Bâli ta‘rîfleriyle mu‘arrefe Meryem bt. Abdullah nâm hatun meclis-i şer‘-i şerîf-i enverde zevc-i muhâli‘i işbu râfi‘ü’l-kitâb Mehmed b. Hasan mahzarında ikrâr-ı tâm ve takrîr-i kelâm edip zevcim mezbûr Mehmed zimmetinde mütekarrir ve ma‘kūdün-aleyh olan sekiz yüz akçe mehr-i müeccelim ve nafaka-i iddetim üzerlerine ve me’ûnet-i süknâm dahi kendi üzerime olmak üzere mezbûr Mehmed ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru ba‘de’l-kabûl hukuk-ı zevciyyete müte‘allika âmme-i da‘vâdan herbirimiz âharın zimmetini ibrâ-i âm ile ibrâ ve ıskāt eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ mine’l-Muharremi’l-harâm li-sene mi’e ve elf. Şuhûdü’l-hâl: İbrahim Çelebi b. Ahmed, Mehmed b. İdris, Ali b. Bâli, Ebûbekir b. Hüseyin.