İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 97 Hüküm no: 71 Orijinal metin no: [15b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Firuz bt. Abdullah’ın cariyesi Gülistan bt. Abdullah’ı azat etmiş olduğu Mahmiye-i İstanbul’da Baba Hasan İlmî mahallesinde sâkine iken bundan akdem vefât eden Firuz bt. Abdullah nâm hâtûnun sadrî oğlu ve hasren vârisi olan umdetü’l-eimmeti’l-kirâm Hüseyin Efendi b. Mehmed Efendi meclis-i şer‘-i şerîfde ikrâr ve takrîr-i kelâm edip vâlidem müteveffâ-yı mezbûre Firuz Hatun hayâtında bin doksan senesinde kendüye rıkkını mu‘terife olan işbu orta boylu, açık kaşlı, elâ gözlü Rusiyyetü’l-asl bâ‘isetü hâze’l-kitâb Gülistan bt. Abdullah câriyesini hasbeten lillâhi te‘âlâ ve taleben li-merzâti’r-rabbi’l-a‘lâ mâlından tahrîr ve i‘tâk ve zümre-i harâir-i asliyyâta idrâc ve ilhâk etmişdi, hâlâ mevsûf-ı mezkûre Gülistan târih-i mezkûrdan berü sâir harâir-i asliyyât gibi hürre olup ben dahi müteveffât-ı mezbûrenin ıtk-ı mezbûrunu tecvîz eyledim dedikde mâ-vaka‘a bi’t-taleb ketb olundu. Fi’l-yevmi’s-sânî aşer mine’l-Muharremi’l-harâm li-sene mi’e ve elf. Şuhûdü’l-hâl: Abdülkadir Efendi b. Hüseyin, Yusuf Efendi b. Abdurrahman, Hüseyin Efendi b. Abdullah, Receb Halîfe b. Hüseyin, Süleyman Efendi, Musa Halîfe b. Mustafa, İbrahim Beşe, Mehmed Efendi b. Salih.