İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 99 Hüküm no: 73 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu taifesinden Hazeros v. Hokar’ın Simitçi taifesinden Karaca v. Bogay’daki alacağının tahsilini istemesi Mahmiye-i İstanbul’da Ali Paşa-yı Atîk mahallesinde sâkin Uncu tâifesinden işbu râfi‘ü’l-kitâb Hazeros v. Hokar nâm Ermeni meclis-i şer‘-i şerîf-i enverde Simidçi tâifesinden Karaca v. Bogay nâm Ermeni muvâcehesinde üzerine da‘vâ ve takrîr-i kelâm edip mezbûr Karaca zimmetinde keyli beynimizde ma‘lûm yedimden müşterâ ve makbûz dakīk bahâsından ba‘de külli’l-hesâb iki bin üç yüz kırk akçe hakkım vardır, taleb eylediğimde bana edâdan imtinâ‘ eder, suâl olunup alıverilmesi matlûbumdur dedikde gıbbe’s-suâl merkūm Karaca cevâbında fi’l-hakīka kaziyye vech-i muharrer üzere olup müdde‘î-i merkūm Hazeros’a dakīk bahâsından ba‘de külli’l-hesâb iki bin üç yüz kırk akçe elân zimmetimde lâzımü’l-edâ deynim vardır deyü tav‘an ikrâr u i‘tirâf etmeğin mûcebince meblağ-ı merkūm iki bin üç yüz kırk akçeyi müdde‘î-i merkūm Hazeros’a edâya mezbûr Karaca’ya tenbîh birle mâ-vaka‘a bi’t-taleb ketb olundu. Fi’l-yevmi’s-sâbi‘ aşer min Muharremi’l-harâm li-sene mi’e ve elf. Şuhûdü’l-hâl: İbrahim Çelebi b. Ahmed, Ebûbekir b. Hüseyin, Ali Çelebi b. Bâli, Mehmed Çelebi b. Abdi ve gayruhüm.