İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 99 Hüküm no: 74 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi taifesinden Kostandi v. Mıgırdıç’ın Eğin kazası Gemürkap köyündeki bağını Nikogos v. Avanis’e satması Mahmiye-i İstanbul’da Ayasofya kurbünde sâkin Ekmekçi tâifesinden Kostandi v. Mıgırdıç nâm Ermeni meclis-i şer‘-i şerîf-i enverde işbu bâ‘isü’t-terkīm Nikogos v. Avanis nâm Ermeni muvâcehesinde ikrâr-ı tâm ve takrîr-i kelâm edip akd-i âtî sudûruna değin silk-i mülkümde münselik olup vilâyet-i Anadolu’da Eğin kazâsına tâbi‘ Gemürkap nâm karye bâğları sınırı dâhilinde dere yanında vâki‘ bir [tara]fı Himmet bâğı ve bir tarafı Margos bâğı ve bir tarafı Arakil bâğı ve bir tarafı Çengi bâğı ile mahdûd üst yanı Arı Hanı? yeri Maşta‘? bağı demekle ma‘rûf arasından yol geçer ikisi dokuz arklık iki kıt‘a bâğımı suyu ve cümle tevâbi‘ ve levâhıkı ile mezkûr Nikogos’a beş yüz on guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk ol dahi iştirâ ve kabûl ve temellük eyledikden sonra semeni olan meblağ-ı mârru’z-zikr beş yüz on guruşu yedinden kabz edip meblağ-ı mezbûru mahallinde kabz ve tasarrufa mezbûru taslît eyledim, ba‘de’l-yevm zikr olunan iki kıt‘a bâğ-ı mezbûr Nikogos’un mülk-i müşterâsıdır, keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer mine’l-Muharremi’l-harâm li-sene mi’e ve elf. Şuhûdü’l-hâl: Hızır Bey b. Hüseyin Ağa, İbrahim Çelebi b. Ahmed, Mehmed Çelebi b. ( ), Maldem v. Perboş, Margos v. Çaylak.