İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 100 Hüküm no: 75 Orijinal metin no: [16b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Çelebi b. Mustafa’nın el-Hac Ahmed b. İbrahim’den satın aldığı cariyeyi ayıplı olduğu iddiasıyla iade etmek istemesi Mahmiye-i İstanbul’da Mahmud Paşa Câmi‘-i şerîfi kurbünde sâkin Osman Çelebi b. Mustafa meclis-i şer‘-i şerîf-i enverde işbu bâ‘isü’l-kitâb el-Hâc Ahmed b. İbrahim mahzarında üzerine da‘vâ ve takrîr-i kelâm edip mezbûr el-Hâc Ahmed târih-i kitâbdan üç buçuk ay mukaddem işbu orta boylu, açık kaşlı, elâ gözlü Rusiyyetü[‘l-asl] câriyesini cemî‘ uyûbdan sâlime olmak üzere seksen iki buçuk guruşa bana bey‘ ve teslîm, ben dahi iştirâ ve teslîm-i semen etmişdim, lâkin mev[sû]f-ı mezbûrenin kulağı sâğır ve sol kolunun kat‘â kuvveti olmadığı ayıbına muttali‘ oldum, ayb-ı merkūm kadîm ve inde’t-tüccâr noksân-ı semen eder uyûbdan olmağla red olunup semeni deyü verdiğim meblağ-ı mezbûrun alıverilmesi matlûbumdur dedikde câriye-i mezkûrede zikr olunan ayıbların vücûdu mütehakkık olmayıp summu ve kolunun ayb-ı mezbûr ile mu‘ayyebe olmadığı lede’ş-şer‘ zâhir ve mütebeyyin olmağla mezbûr el-Hâc Ahmed’e suâl dahi teveccüh etmeyip işbu vesîka bi’t-taleb ketb olundu. Fi’l-yevmi’l-hâmis aşer mine’l-Muharremi’l-harâm li-sene mi’e ve elf. Şuhûdü’l-hâl: İbrahim Çelebi b. Ahmed, Ali Beşe b. Bâli, Ebûbekir b. Hüseyin.