İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 101 Hüküm no: 76 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal taifesinden Kiryazi v. Yorgi’nin Yani v. Todori ve ortağı Süleyman b. Nikola’daki alacaklarının tahsilini istemesi Bakkal tâifesinden olup mahmiye-i İstanbul’da Aksaray Çarşısı’nda sâkin işbu bâ‘isü’l-vesîka Kiryazi v. Yorgi nâm zimmî meclis-i şer‘-i şerîf-i enverde tâife-i mezbûreden olup mahmiye-i mezbûrede Tahtakale Sûku’nda sâkin Yani v. Todori nâm zimmî muvâcehesinde üzerine da‘vâ ve takrîr-i kelâm edip mezbûr Yani ve şerîki gāib ani’l-meclis Süleyman b. Nikola nâm mühtedî zimmetlerinde iştirâk-i seviy üzere yedimden istidâne ve kabz etdikleri nukūddan ve iştirâ ve kabz eyledikleri beynimizde ma‘lûm bakkal metâ‘ı bahâsından cem‘an altmış bin akçe hakkım olup ve her biri meblağ-ı mezbûrdan âharın zimmetine lâzım gelen meblağa bi’l-emr ve’l-kabûl kefâlet-i sahîha-i şer‘iyye ile kefil dahi olmuşlar idi. Hâlâ mezbûr Yani’ye suâl olunup ve asâlet ve kefâletine binâen meblağ-ı mezbûr cem‘an altmış bin akçeyi bana edâ ve teslîme tenbîh olunmak matlûbumdur dedikde gıbbe’s-suâl mezbûr Yani dahi cevâbında müdde‘î-i mezbûrdan kendi ve şerîki merkūm Süleyman istidâne eyledikleri nukūd ve bakkal metâ‘ı bahâsından zimmetlerinde müşterek altmış bin akçe deynleri olduğunu ikrâr lâkin her biri âharın zimmetine lâzım gelen meblağa kefil olduğunu inkâr etdiğinden mâ‘adâ târih-i kitâbdan on dört gün mukaddem ben meblağ-ı mezbûrdan kendi deynim olan otuz bin akçenin yirmi sekiz bin beş yüz akçesi mukābelesinde müdde‘î-i mezbûra mahmiye-i mezbûrede Sultan Selim Câmi‘-i şerîfi havlusunda doksan beş frengî altını edâ ve teslîm, ol dahi yedimden ahz u kabz etmekle ancak bin beş yüz akçe deynim kalmışdır deyü meblağ-ı mezbûrun yirmi sekiz bin beş yüz akçesini def‘le mukābele edicek, gıbbe’l-istintâk ve’l-inkâr evvelâ mezbûr Kiryazi’den kefâlet da‘vâsına beyyine taleb olundukda isbât için istimhâl etmekle mehl-i şer‘î verilip ve sâniyen mezbûr Yani’den def‘-i mezbûruna muvâfık beyyine taleb olundukda ol dahi mehil taleb etmekle kezâlik imhâl olunup müddet-i mehl münkaziye olup ve mezbûr Yani bir vechile isbât-ı beyyineye kādir olamayıp ba‘dehû şâhidlerim Tekfurdağı’na gitmişler deyü izhâr-ı acz edip istihlâf dahi etmediği mûcebince ikrârı üzere asâleten kendi deyni olan meblağ-ı mezbûr otuz bin akçeyi müdde‘î-i mezbûr Kiryazi’ye edâ ve teslîme mezbûr Yani’ye ba‘de’t-tenbîh mâ-vaka‘a bi’t-taleb ketb olundu ve imlâ olundu. Fi’l-yevmi’s-sâmin ve’l-ışrîn min-Zilhicce li-sene tis‘a ve tis‘în ve elf. Şuhûdü’l-hâl: İbrahim Çelebi b. Ahmed, Çukadâr el-Hâc Süleyman b. Abdi, Hüseyin Çelebi b. Mehmed, Mustafa b. Şaban, Ebûbekir b. Hüseyin.