İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 102 Hüküm no: 77 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaplan Paşa hazinedarı iken vefat eden Yusuf Ağa’nın oğlu Mehmed’in hazinedeki alacağının tahsili Sâbıkā Kaplan Paşa hazînedârı iken bundan [akdem] vefât eden merhûm Yusuf Ağa’nın sagīr oğlu Mehmed’in vasîsi olan bâ‘is-i hâze’l-kitâb el-Hâc Mehmed Çelebi b. ( ) nâm kimesne dîvân-ı kāimmakām-ı hazret-i sadr-ı a‘zamîde ma‘kūd meclis-i şer‘-i şerîf-i âlîde devletlü ve sa‘âdetlü kāimmakām-ı müşârun-ileyh hazretleri huzûr-ı âlîlerinde bi’l-vesâye ikrâr ve takrîr-i kelâm edip yedimde olan hüccet nâtık olduğu üzere bundan akdem sefer-i hümâyûn mühimmâtı için istidâne iktizâ etmekle sagīr-i mezbûr mâlından sâbık vasî olan Şaban Ağa yedinden yedi bin beş yüz guruşu mîrî tarafından istidâne ve kabz olunup ve çuka bahâsından dahi beş yüz guruş ki cem‘an sekiz bin guruş sagīr-i mezbûra mîrînin deyni mukābelesinde işbu hâlâ tahmîn olunan iki bin beş yüz guruş kıymetli on üç yâftelü bir kemer kuşak ve def‘a üç kapaklı ve iki bin beş yüz guruş kıymetli bir altın ön kuşak rehin vaz‘ olunmuşdu. El-hâletü hâzihî rihân-ı mezbûre değer bahâlarıyla deyn-i merkūme mukābelesinde temlîk olunmak bâbında hatt-ı hümâyûn-ı şevket-makrûn vârid olmağla [17b] paşa-yı müşârun-ileyh hazretleri dahi bi’l-vekâle zikr olunan iki kuşağı deyn-i mezbûr mukābelesinde sagīr-i mezbûra temlîk ve teslîm, ben dahi bi’l-vesâye temellük ve tesellüm ve kabûl eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî evâsıtı Zilhicce li-sene tis‘a ve tis‘în ve elf. Şuhûdü’l-hâl: Mehmed Efendi b. Mehmed, İbrahim Ağa Kethudâ-yı ( ) Efendi, Mehmed Kuyumcubaşı, Mustafa Ağa b. ( ) Muhzırân, Ahmed Çelebi b. Mehmed.