İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 102 Hüküm no: 78 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçador v. Hacet’in Mustafa Paşa-yı Atik mahallesindeki evini oğlu Karabet’e satması Mahmiye-i İstanbul’da Mustafa Paşa-yı Atîk mahallesinde sâkin Haçador v. Hacet nâm Ermeni meclis-i şer‘-i şerîf-i enverde kebîr oğlu işbu râfi‘ü’l-kitâb Karabet v. Yani muvâcehesinde üzerine da‘vâ ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafı Kiragos mülkü ve bir tarafı Karabet mülkü ve bir tarafı Papa Asvador mülkü ve bir tarafı tarîk-i âm ile mahdûd üç bâb fevkānî oda ve bir fevkānî matbah ve bir sofa ve dehlîz ve iki tahtânî oda ve bir bi’r-i mâ ve bodrum ve kenîfi müştemil mülk menzilimi bin doksan altı sene[si] Cemâziyelevvelîsi gurresinde altı yüz esedî guruşa oğlum mezbûr Karabet’e bey‘ ve temlîk ve teslîm ol dahi iştirâ ve kabûl ve kabz ve tesellüm eyledikden sonra semeni olan meblağ-ı mezbûrun üç yüz guruşunu yedinden ahz u kabz edip bâkī üç yüz guruşu dahi hâlâ bana edâdan imtinâ‘ eder, suâl olunup meblağ-ı bâkī-i mezbûrun alıverilmesi matlûbumdur dedikde gıbbe’s-suâl mezbûr Karabet cevâbında fi’l-hakīka babam müdde‘î-i mezbûr târih-i mezkûrda menzil-i mahdûd-ı mezbûru altı yüz guruşa bana bey‘ ve teslîm, ben dahi iştirâ ve semen-i mezbûrdan üç yüz guruşu teslîm eylediğimde ol dahi kabz ve mâ‘adâ üç yüz guruşdan zimmetimi ibrâ ve ıskāt edip hatta vech-i muharrer üzere olan bey‘ ve kabz ve ibrâsını ol târihde Davud Paşa Mahkemesi’nde nâibü’ş-şer‘i’ş-şerîf olan Mehmed Emin Efendi huzûrunda tâyi‘an ikrâr u i‘tirâf edip hüccet-i şer‘iyye dahi tahrîr olunmuşdu deyü def‘le mukābele ve mazmûnu min külli’l-vücûh takrîr-i meşrûhuna mutâbık hüccet-i şer‘iyye ibrâz etmeğin gıbbe’l-istintâk mezbûr Haçador cevâbında fi’l-hakīka târih-i mezkûrda semen-i mezbûr altı yüz guruşdan üç yüz guruşunu kabz ve mâ‘adâ üç yüz guruşdan zimmetini ibrâ ve ıskāt edip hüccet-i şer‘iyye tahrîr etdirdiğini bi’t-tav‘i’s-sâf ikrâr u i‘tirâf etmeğin mûcebiyle mezbûr Haçador bî-vech mu‘ârazadan men‘ olunup mâ-vaka‘a bi’t-taleb ketb olundu. Fî selhi Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: Ahmed Efendi b. Mehmed, İbrahim Çelebi b. Ahmed, Mehmed Çelebi Çorlulu, Ali b. Bâli, İvaz Efendi b. Şaban, Mustafa b. Ali, Ahmed b. Ali, Mehmed Efendi b. Sefer.