İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 103 Hüküm no: 80 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haffaf el-Hac Mehmed b. Abdullah’ın Mustafa Çelebi b. el-Hac Ahmed’deki alacağının bir kısmını alarak kalanla ilgili zimmetini ibra etmesi Mahmiye-i İstanbul’da Çakır Ağa mahallesi sükkânından Haffâf el-Hâc Mehmed b. Abdullah nâm kimesne meclis-i şer‘-i şerîf-i enverde işbu râfi‘ü’l-kitâb Mustafa Çelebi b. el-Hâc Ahmed nâm kimesne mahzarında ikrâr-ı tâm ve takrîr-i kelâm edip mezbûr Mustafa Çelebi bundan akdem merhûm Kethudâ Mustafa Efendi Vakfı’ndan mutasarrıf olduğu yevmî beş akçe vazîfe ile kitâbet ve yevmî iki akçe vazîfe ile cüzhânlık cihetlerini abd-i me’zûnum işbu hâzır bi’l-meclis İvaz b. Abdullah’a ferâgat eyledikde ben kendi mâlımdan merkūm Mustafa Çelebi’ye iki yüz esedî guruşumu hibe-i sahîha-i şer‘iyye ile hibe ve temlîk ve teslîm edip ol dahi meclis-i hibede ittihâb ve kabûl ve kabz ve kendi mesârifine istihlâk etmişdi. Hâlâ mezbûr Mustafa Çelebi meblağ-ı mezbûrun kırk guruşunu kendi rızâsıyla bana def‘ ve teslîm, ben dahi ahz u kabz edip mâ‘adâsı olan yüz altmış guruşa ve bi’l-cümle târih-i kitâba gelince beynimizde cereyân eden sâir ahz u i‘tâya müte‘allika âmme-i da‘vâdan mezbûr Mustafa Çelebi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim, min ba‘d mezbûr Mustafa Çelebi ile vechen mine’l-vücûh da‘vâ ve nizâ‘ımız kalmadı dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-Muharremi’l-harâm li-sene mi’e ve elf. Şuhûdü’l-hâl: İmâmzâde Mehmed Efendi b. Mustafa, Abdurrahman Efendi b. Mehmed Kâtib-i Muhâsebe, Mustafa Çelebi b. Hüseyin, Kara İbrahim Efendi Kâtib, Hâfız Ali Çelebi, İbrahim Çelebi b. Yusuf, Abdurrahim Efendi b. Hüseyin, İbrahim Çelebi b. Ali.