İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 104 Hüküm no: 82 Orijinal metin no: [18a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. el-Hac Ali’nin Katip Sinan mahallesindeki evini Fatma bt. Mehmed’e satması Mahmiye-i İstanbul’da Çelebioğlu mahallesinde sâkin Mustafa Çelebi b. el-Hâc Ali meclis-i şer‘-i şerîf-i enverde mahmiye-i mezbûrede Kâtib Sinan mahallesinde sâkine bâ‘isetü’l-vesîka Fâtıma bt. Mehmed nâm hâtûnun sadrî oğlu ve tarafından âti’l-beyâna vekîl-i şer‘îsi olan el-Hâc Osman Çelebi b. Bayezid mahzarında ikrâr-ı tâm ve takrîr-i kelâm edip akd-i âtî sudûruna değin yedimde mülk ve hakkım olup mârru’z-zikr Kâtib Sinan mahallesinde vâki‘ bir tarafdan merkūm el-Hâc Osman Çelebi menzili ve bir tarafdan el-Hâc Mehmed menzili ve bir tarafdan tarîk-i hâs ve bir tarafdan tarîk-i âm ile mahdûd olup arsası tûlen ve arzen bi-hesâb-ı terbî‘i beş yüz zirâ‘ ve senede merhûme Kamer Hatun Vakfı’na altmış akçe mukāta‘a-i kadîmesi olup bir su kuyusu ve bir mahzen ve enkāz-ı ma‘lûmeyi müştemil olan menzilimi bi-cümletit- tevâbi‘ ve’l-levâhık bey‘-i bâtt-ı kat‘î ile vekîl-i merkūm el-Hâc Osman Çelebi’ye altmış dört bin beş yüz akçeye bey‘ ve teslîm, ol dahi vâlidesi ve müvekkilesi mezbûre Fâtıma Hatun için bi’l-vekâle iştirâ ve kabûl ve tesellüm etdiğinden sonra semeni olan meblağ-ı mezbûr altmış dört [17b] bin beş yüz akçeyi vekîl-i merkūm yedinden tamâmen ahz u kabz eyledim, ba‘de’l-yevm menzil-i mezbûrda vechen mine’l-vücûh alâka ve medhalim kalmayıp müvekkile-i mezbûre Fâtıma Hâtûn’un mülk-i müşterâsı ve hakk-ı sırfı olmuşdur, keyfe mâ tehtâr mutasarrıfa olsun dedikde gıbbe’t-tasdîki’l-vicâhî mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Zilhicce li-sene tis‘a ve tis‘în ve elf. Şuhûdü’l-hâl: Ömer Efendi İmâm, Fennî Mehmed Efendi, Yusuf Efendi el-Müezzin, el-Hâc Abdi, el-Hâc Süleyman b. ( ), Ahmed Çelebi b. ( ).