İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 105 Hüküm no: 83 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefine reislerinden Mehmed Reis b. Ahmed’e buğday ticaretinde ortakları olan Hüseyin Reis b. Abdullah ve İbrahim Çelebi b. Hüseyin tarafından haksız muarazalarının önlenmesi Sefîne reislerinden işbu râfi‘ü’l-kitâb Mehmed Reis b. Ahmed meclis-i şer‘-i şerîf-i enverde Hüseyin Reis b. Abdullah ve İbrahim Çelebi b. Hüseyin mahzarında takrîr-i kelâm edip bundan akdem bi-tarîki’l-mudârebe merkūm Hüseyin Reis kendi mâlından yüz doksan guruş ve merkūm İbrahim Çelebi üç yüz guruş ve gāib ani’l-meclis Mustafa Çelebi nâm kimesne yüz guruş ve ben kendi mâlımdan iki yüz yetmiş yedi guruş ki cem‘an sekiz yüz guruş ihrâc ve birbirine halt edip meblağ-ı mecmû‘-ı merkūm ile kasaba-i Mankalya’dan ma‘lûmül-mikdâr buğday iştirâ ve sefîneye tahmîl ve mahmiye-i İstanbul’a getirip bey‘ ve kabz-ı semen eylediğimden sonra hâlâ kıbel-i şer‘den beynimizde muhâsebe görüldükde zikr olunan buğdayın fâidesinden harc-ı kudemâsına ve esedî başı ve ücret-i mellâhîn ve ücret-i sefîneye ve bi’l-cümle harc-ı lâzıme ihrâc olundukda altmış guruş bâkī kalıp meblağ-ı bâkī-i mezbûr re’s-i mâlımıza göre iktisâm olundukda mezbûr Hüseyin Reis’in asl-ı mâlı olan yüz doksan guruşa on üç guruş ve merkūm İbrahim Çelebi’nin asl-ı mâlı olan üç yüz guruşa yirmi bir guruş ve mezbûr Mustafa Çelebi’nin asl-ı mâlı olan yüz guruşuna yedi guruş ve benim mâlım olan iki yüz yetmiş yedi guruşa on dokuz guruş isâbet edip asl-ı mâlları ile fâidesinden isâbet eden sâlifü’z-zikr meblağları kendülere tamâmen def‘ ve teslîm edip mesârif-ı mezkûrede ve mârrü’l-beyân buğdayın iştirâ ve bey‘ olundukda semenlerinde bir vechile hîlem olmadığına tahlîf dahi olunmuş iken mezbûrân Hüseyin Reis ve İbrahim Çelebi bi-gayrı vech-i şer‘î bana ta‘arruz ederler, suâl olunup takrîrleri tahrîr ve bî-vech mu‘ârazadan men‘ olunmak matlûbumdur dedikde gıbbe’s-suâl merkūmân Hüseyin Reis ve İbrahim Çelebi cevâblarında fi’l-hakīka kaziyye bâlâda tafsîl ü beyân ve şerh ü ayân olunan vech üzere olduğunu her biri tav‘an ikrâr u i‘tirâf etmeğin mûcebiyle mezbûrân Hüseyin Reis ve İbrahim Çelebi bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yemvi’t-tâsi‘ ve’l-ışrîn min-Zilhicce. Şuhûdü’l-hâl: İbrahim Çelebi b. Ahmed, el-Hâc Abdi b. Mahmud, Şaban Beşe, Ali [b.] Bâli.