İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 107 Hüküm no: 85 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Nikola’nın borç aldığı Hüseyin Ağa b. Şeyh Mehmed’e rehin bıraktığı evin Asvador’un oğulları Toros ve Mihail’e satılması Mahmiye-i İstanbul’da Ali Paşa-yı Atîk mahallesi sükkânından Yani v. Nikola v. Nafi nâm zimmî tarafından ber-vech-i âtî vekîl olduğu Papa Dimitri v. Papa Asanaki nâm zimmî ve İbrahim b. Abdullah nâm kimesneler şehâdetleriyle şer‘an sâbit ve sübût-ı vekâletine hükm-i şer‘î lâhık olan Hüseyin Efendi b Abdulbâki nâm kimesne meclis-i şer‘-i şerîf-i enverde işbu râfi‘ü’l-vesîka Toros ve Mihail veledey Asvador nâm zimmîler muvâcehelerinde bi’l-vekâle ikrâr-ı tâm ve takrîr-i [kelâm] edip müvekkilim mezbûr Yani bin doksan altı senesi şehr-i Rebî‘ülevvel’inin sekizinci günü gāib ani’l-meclis Hüseyin Ağa b. Şeyh Mehmed’den yüz esedî guruş istidâne ve kabz ve meblağ-ı mezbûr mukābelesinde silk-i mülkümde münselik olup mahalle-i mezbûrede vâki‘ bir tarafdan Hayyât Ermeni mülkü ve bir tarafdan Şiryan nâm zimmî mülkü ve bir tarafdan Kosta zimmî mülkü ve bir tarafdan tarîk-i âm ile mahdûd fevkānî bir oda ve tahtânî iki oda ve kenîf ve bahçeyi müştemil mülk menzilini bi-tarîki’l-istiğlâl merkūm Hüseyin Ağa’ya rehin vaz‘ ve teslîm ve ba‘de’t-tahliye târih-i mezbûreden bir sene tamâmına değin on beş guruşa istîcâr ve kabûl eyledikden sonra asl-ı mâl-ı merkūm ile ücret-i mezbûreyi ecel-i mezbûr hulûlünde mezbûr Hüseyin Ağa’ya edâ etmezse menzil-i mezbûru semen-i misli ile âhara bey‘ ve kabz-ı semene ve semeninden deyn-i mezbûru edâya vekâlet-i devriye ile tarafından beni vekîl etmekle ben dahi vekâlet-i mezbûreyi kabûl edip ecel-i mezkûr hulûl edip meblağayn-i mezbûreyni edâ etmemekle ben dahi mezbûr Yani’nin zimmet-i mezbûrunu edâ için menzil-i merkūmu münâdî el-Hâc Murad yediyle Sûk-ı Sultânî’de nidâ ve müzâyede etdirip rağabât-ı nâs münkatı‘a oldukda mezbûrân Toros ve Mihail üzerlerinde on sekiz bin akçede karâr edip ziyâde ile tâlib-i âhar olmayıp ve meblağ-ı mezbûr menzil-i merkūmun hîn-i akidde semen-i misli idiği sikāt ihbârlarıyla müte‘ayyin olmağla menzil-i mahdûd-ı mezbûru bi-cümleti’t-tevâbi‘ ve’l-levâhık merkūmân Toros ve Mihail’e ber-vech-i muharrer semen-i misli olan meblağ-ı merkūm on sekiz bin akçeye bi’l-vekâle bey‘ ve teslîm, onlar dahi iştirâ ve kabûl ve tesellüm eylediklerinden sonra semen-i merkūm on sekiz bin akçeyi yedlerinden tamâmen ahz u kabz eyledim, fîmâ-ba‘d menzil-i merkūm mezbûrânın mülk-i müşterâları olmuşdur, keyfe mâ yeşâ’ mutasarrıf olsunlar dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sâlis min-Muharremi’l-harâm li-sene mi’e ve elf. Şuhûdü’l-hâl: Ömer Efendi b. Mehmed, İbrahim Efendi b. Ali el-İmâm, İsmail Çelebi b. Süleyman el-Müezzin, Ömer Efendi b. ( ), Abdülkerim Çelebi el-Kayyûm.