İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 108 Hüküm no: 86 Orijinal metin no: [19a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İzmit kasabasından Mehmed Çelebi b. Bayram’ın evini el-Hac Ahmed b. Ramazan’a satması Vilâyet-i Anadolu’da İznikmid kasabasında Uruslar mahallesi sâkinlerinden Mehmed Çelebi b. Bayram nâm kimesne meclis-i şer‘-i şerîf-i enverde bâ‘is-i hâze’l-kitâb el-Hâc Ahmed b. Ramazan nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûre[de] vâki‘ bir tarafdan Korucuoğlu mülkü ve bir tarafdan Ali Beşe mülkü ve bir tarafdan âhar mülküm ve bir tarafdan tarîk-i âm ile mahdûd iki bâb tahtânî oda ve bir kenîf ve bahçeyi müştemil mülk menzilimi cümle-i tevâbi‘ ve levâhıkı ve kâffe-i hukūk ve merâfıkı ile mezbûr el-Hâc Ahmed’e tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile elli esedî guruşa bey‘, ol dahi ber-vech-i muharrer iştirâ ve kabûl etdiğinden sonra semeni olan meblağ-ı mezbûr elli esedî guruşu mezbûr el-Hâc Ahmed yedinden tamâmen ahz u kabz eyledim, ba‘de’l-yevm menzil-i mahdûd-ı mezkûru mahallinde zabt u tasarrufa mezbûr el-Hâc Ahmed[’i] taslît eyledim, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Muharremi’l-harâm li-sene mi’e ve elf. Şuhûdü’l-hâl: Ahmed Efendi b. Mustafa, İbrahim Çelebi b. el-Hâc Mustafa, Ahmed Çelebi b. Mustafa, el-Hâc Ömer b. Durmuş.